ഷെയ്ൻ നിഗം സംവിധായകനാകുന്നു

മലയാളികളുടെ പ്രീയപ്പെട്ട യുവതാരങ്ങളിലൊരാളാണ് ഷെയ്ൻ നിഗം. ഒരു നടനെന്ന നിലയിൽ തന്റെ അഭിനയത്തികവ് കൊണ്ട് കയ്യടി നേടിയെടുത്ത ഈ പ്രതിഭ ഇപ്പോൾ സംവിധായകനായുമെത്തുകയാണ്. ഒരു ഹൃസ്വ ചിത്രമൊരുക്കിക്കൊണ്ടാണ് ഷെയ്ൻ നിഗം സംവിധായകന്റെ കുപ്പായമണിയുന്നത്. മാജിക് റിയലിസം വിഭാഗത്തിൽപ്പെടുന്ന സംവേർ എന്ന് പേരുള്ള ചിത്രമാണ് ഷെയ്ൻ നിഗം ഒരുക്കിയിരിക്കുന്നത്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇപ്പോൾ സോഷ്യൽ മീഡിയയുടെ ശ്രദ്ധ നേടിയെടുക്കുകയാണ്. തന്റെ സ്വന്തം ഒടിടി പ്ലാറ്റ്‌ഫോമിലൂടെയാണ് ഷെയ്ൻ നിഗം ഈ ചിത്രം റിലീസ് ചെയ്യാൻ പോകുന്നത് എന്ന പ്രത്യേകതയുമുണ്ട്. തന്റെ ഫേസ്ബുക്ക് പോസ്റ്റിലൂടെ ഷെയ്ൻ തന്നെയാണ് ഇക്കാര്യം ആരാധകരോടും പ്രേക്ഷകരോടുമായി പങ്ക് വെച്ചത്. തന്റെ സ്കൂൾകാല സുഹൃത്തുക്കൾക്കൊപ്പം ഷെയ്ൻ കൈകോർക്കുന്ന ചിത്രമെന്ന പ്രത്യേകതയും സംവേർ എന്ന ഈ ഹൃസ്വ ചിത്രത്തിനുണ്ട്.

26 മിനിറ്റ് ദൈർഘ്യമുള്ള ഈ ഹൃസ്വ ചിത്രത്തിൽ നാല് കഥാപാത്രങ്ങളാണുണ്ടാവുകയെന്നാണ് റിപ്പോർട്ടുകൾ പറയുന്നത്. ഈ ചിത്രത്തിന്റെ അണിയറയിൽ പ്രവർത്തിച്ചവരിൽ ഏറെയും സ്കൂൾ നാളുകൾ മുതൽ ഷെയ്ൻ നിഗമിന് സൗഹൃദമുള്ളവരാണ്. ഈ ഹൃസ്വ ചിത്രത്തിന്റെ കഥ, തിരക്കഥ, ക്യാമറ, എഡിറ്റിംഗ്, സംഗീതം എന്നിവയെല്ലാം നിർവഹിച്ചത് ഷെയ്ൻ നിഗം തന്നെയാണ്. ഫയാസ് എൻ. ഡബ്ലിയുവും ഈ ചിത്രത്തിന്റെ തിരക്കഥാ രചനയിൽ ഷെയ്ൻ നിഗമിനൊപ്പം ചേർന്നിട്ടുണ്ട്. പ്രകാശ് അലക്സാണ് ഈ ചിത്രത്തിന് വേണ്ടി പശ്‌ചാത്തല സംഗീതം നിർവഹിച്ചിരിക്കുന്നത്. തിരക്കഥ രചനയിൽ പങ്കാളിയായ ഫയസ് എൻ.ഡബ്ലിയു തന്നെയാണ് ഈ ചിത്രത്തിന് വേണ്ടി കലാസംവിധാനവും നിർവഹിച്ചിരിക്കുന്നത്. ബെർമുഡ, കുർബാനി, ഖൽബ്‌, വേല, ആയിരത്തൊന്നാം രാവ്, പൈങ്കിളി, പരാക്രമം എന്നിവയാണ് ഷെയ്ൻ നിഗം എന്ന നടൻ പ്രധാന വേഷങ്ങൾ ചെയ്ത് ഇനി റിലീസ് ചെയ്യാൻ ഉള്ള ചിത്രങ്ങൾ.