പുതിയത് പലതും പഠിക്കുകയാണ്; ലോക്ക് ഡൗണിലെ കുടുംബ വിശേഷങ്ങൾ പങ്കു വെച്ച് റഹ്മാൻ

കോറോണക്കെതിരെയുള്ള പോരാട്ടത്തിന്റെ ഭാഗമായി ഇന്ത്യ മുഴുവൻ ലോക്ക് ഡൌൺ ആണിപ്പോൾ. മാർച്ച് രണ്ടാം വാരം മുതൽ ഇന്ത്യൻ സിനിമയും പൂർണ്ണമായും നിലച്ചു കിടക്കുകയാണ്. ഷൂട്ടിങ്ങുകൾ ഇല്ല, പോസ്റ്റ്-പ്രൊഡക്ഷൻ ജോലികൾ ഇല്ല, സിനിമ തീയേറ്ററുകൾ ഇല്ല. താരങ്ങളും സാങ്കേതിക പ്രവർത്തകരുമെല്ലാം തങ്ങളുടെ വീട്ടിൽ തന്നെയാണ്. തിരക്കുള്ള താരങ്ങളും സാങ്കേതിക പ്രവർത്തകരും ഈ സമയം തങ്ങളുടെ കുടുംബത്തോടൊപ്പം ചെലവഴിക്കാനായുള്ള ഒരു വലിയ അവസരമായി കണ്ടു കൊണ്ടാണ് മുന്നോട്ടു പോകുന്നത്. പലരും വീടുകളിൽ വളരെ രസകരമായ പല ജോലികളുമാണ് ചെയ്യുന്നത്. പ്രശസ്ത തെന്നിന്ത്യൻ നടനായ റഹ്മാനും വീടിനുള്ളിലെ ഈ ജീവിതം ആസ്വദിക്കുകയാണ്. ഭാര്യക്കൊപ്പം വീട്ടു ജോലികൾ ഏറ്റെടുത്തു കൊണ്ടാണ് റഹ്മാൻ ഈ സമയം ചെലവഴിക്കുന്നത്. ഭാര്യയോടൊപ്പം അലക്കിയ വസ്ത്രങ്ങളെല്ലാം വിരിച്ചിടുന്ന ഫോട്ടോകൾ ഫേസ്ബുക്ക് പേജിലൂടെ റഹ്മാൻ പങ്കു വെച്ചത് വലിയ ശ്രദ്ധയാണ് നേടിയത്.

ലോക്ക് ഡൗൺ സമയത്ത് പുതിയ പലതും പഠിക്കുകയാണ് താനെന്നും ജോലിക്കാരെ എല്ലാം അവരുടെ വീടുകളിലേക്ക് പറഞ്ഞ് വീട്ട് ജോലികളെല്ലാം ഭാര്യക്കൊപ്പം ചേർന്ന് സ്വയം ചെയ്യാനാണ് തീരുമാനിച്ചത് എന്നും അദ്ദേഹം സൂചിപ്പിക്കുന്നു. അതുപോലെ തന്നെ ഓൺലൈൻ വഴിയും പുതിയ ചില കാര്യങ്ങൾ താൻ പഠിക്കുകയാണ് എന്നും ഈ താരം പറയുന്നു. തുണിയലക്കൽ മാത്രമല്ല, ഭാര്യക്കൊപ്പം അടുക്കളയിൽ കയറി പാചകം ചെയ്യുകയും കൂടിയാണ് റഹ്മാൻ. അടുക്കളയിൽ കയറാൻ മടിയുള്ള കുട്ടികളേയും പാചകം പഠിപ്പിക്കാൻ ഈ സമയമുപയോഗിക്കുകയാണ് താരം. സ്‌കെച്ചിംഗ്, ഫോട്ടോഷോപ്പ് എന്നിവ ഓൺലൈനിലൂടെ പഠിക്കുന്ന റഹ്മാൻ കോവിഡ് രോഗികൾക്കും അതുമൂലം കഷ്ട്ടപ്പെടുന്ന മറ്റുള്ളവർക്കും വേണ്ടി എന്ത് ചെയ്യാമെന്ന ആലോചനയിൽ കൂടിയാണ്.