ഗോഡ് ഫാദറുമായി വീണ്ടും ലാൽ എത്തുന്നു….ഇത്തവണ കട്ട കലിപ്പ് ലുക്കിൽ…

അഭിനേതാവ് സംവിധായകൻ സംസ്ഥാന അവാർഡ് ഉൾപ്പടെ കരസ്ഥമാക്കിയ മികച്ച നടൻ അങ്ങനെ വിശേഷണങ്ങൾ ഒരുപാടുണ്ട് ലാലിന്. മിമിക്രി വേദികളിലൂടെ സിനിമയിലേക്ക് എത്തിയ ലാൽ പക്ഷെ സംവിധായകനായാണ് മലയാള സിനിമയിൽ അരങ്ങേറുന്നത്. സുഹൃത്തും സംവിധായകനുമായ സിദ്ധിഖിനോടൊപ്പം ഒരുക്കിയ ചിത്രങ്ങൾ മലയാള സിനിമാ ചരിത്രത്തിലെ തന്നെ ഏറ്റവും മികച്ച ചിത്രങ്ങളായിരുന്നു. ഭൂരിഭാഗം ചിത്രങ്ങളിലും നായകനായി എത്തിയതാവട്ടെ മുകേഷും. ചിത്രങ്ങളുടെ വിജയങ്ങൾ അന്ന് മുകേഷിന്റെ കരിയർ ഗ്രാഫ് വലിയതോതിൽ ഉയർത്താൻ സഹായിച്ചിരുന്നു. അത്തരത്തിൽ മുകേഷ് – സിദ്ധിഖ് ലാൽ കൂട്ടുകെട്ടിൽ പിറന്ന സൂപ്പർ ഹിറ്റ് ചിത്രമാണ് ഗോഡ് ഫാദർ. ചിത്രം വമ്പൻ വിജയമായതിനൊപ്പം ഏതാണ്ട് മൂന്നൂറിൽപ്പരം ദിവസങ്ങൾ തീയേറ്ററിൽ പ്രദർശിപ്പിക്കുകയുമുണ്ടായി. മലയാളികളുടെ പ്രിയപ്പെട്ട ചിത്രം ഗോഡ് ഫാദറിന്റെ അതേപേരിൽ ഒരു ചിത്രത്തിലൂടെ വീണ്ടും എത്തുകയാണ് ലാൽ.

ഗോഡ് ഫാദർ എന്ന തമിഴ് ചിത്രത്തിലൂടെയാണ് ഇത്തവണ വരവ്. ചിത്രത്തിൽ ഒരു ഗുണ്ടാ നേതാവിന്റെ വേഷത്തിലായിരിക്കും ലാൽ എത്തുക. നരച്ച താടിയും കയ്യിൽ വടിവാളുമായി നിൽക്കുന്ന ലാലിന്റെ ചിത്രങ്ങൾ ഇതിനോടകം തന്നെ ഏറെ ശ്രദ്ധേയമായി മാറിക്കഴിഞ്ഞു. ലാൽ തന്നെയാണ് കഴിഞ്ഞ ദിവസം ചിത്രങ്ങൾ തന്റെ ഇൻസ്റാഗ്രാമിലൂടെ പങ്കുവച്ചത്. കഴിഞ്ഞ ദിവസമായിരുന്നു താരം ചിത്രത്തിൽ ജോയിൻ ചെയ്തത്. സൂപ്പർ ഹിറ്റ് ചിത്രം സണ്ടക്കോഴി ഉൾപ്പടെ പത്തോളം തമിഴ് ചിത്രങ്ങളിൽ ലാൽ അഭിനയിച്ചിട്ടുണ്ട്. തെലുങ്ക് ബ്രഹ്‌മാണ്ഡ ചിത്രം സാഹോയാണ് ലാലിന്റെ ഏറ്റവും പുതിയ ചിത്രം. പ്രഭാസിനൊപ്പം എടുത്ത ചിത്രം അന്ന് വയറലായി മാറിയിരുന്നു.