നടൻ ധ്രുവൻ വിവാഹിതനായി..!

മലയാളത്തിലെ പ്രശസ്ത യുവ താരങ്ങളിൽ ഒരാളായ നടൻ ധ്രുവൻ വിവാഹിതനായി. ഡിജോ ജോസ് ആന്റണി ഒരുക്കിയ ക്വീൻ എന്ന ചിത്രത്തിലൂടെ ശ്രദ്ധ നേടിയ ഈ യുവ താരം ഈ വർഷം റിലീസ് ചെയ്ത വമ്പൻ തമിഴ് ചിത്രമായ വാലിമയ് എന്ന അജിത് കുമാർ- എച് വിനോദ് ചിത്രത്തിലെ വേഷത്തിലൂടെയും ശ്രദ്ധ നേടി. അഞ്ജലി എന്നാണ് ധ്രുവന്റെ വധുവിന്റെ പേര്. പാലക്കാടു വെച്ചാണ് വിവാഹം നടന്നത്. ഇരുവരുടെയും ബന്ധുക്കളും അടുത്ത സുഹൃത്തുക്കളും മാത്രമാണ് വിവാഹത്തിൽ പങ്കെടുത്തത്. ലിസമ്മയുടെ വീട് എന്ന സിനിമയിൽ ജൂനിയർ ആർട്ടിസ്റ്റ് ആയി അഭിനയിച്ചു കരിയർ ആരംഭിച്ച ധ്രുവൻ, ഈ അടുത്തിടെ ആറാട്ട് എന്ന മോഹൻലാൽ- ബി ഉണ്ണികൃഷ്ണൻ ചിത്രത്തിൽ അതിഥി വേഷത്തിലും പ്രത്യക്ഷപ്പെട്ടു. നാൻസി റാണി, ജനഗണമന എന്നിവയാണ് ധ്രുവൻ അഭിനയിച്ചു ഇനി വരാനുള്ള ചിത്രങ്ങൾ.

പട്ടം പോലെ, ഗ്യാങ്സ്റ്റർ, ലോർഡ് ലിവിങ്സ്റ്റൺ 7000 കണ്ടി ഇനീ ചിത്രങ്ങളിലും ജൂനിയർ ആർട്ടിസ്റ്റ് ആയി അഭിനയിച്ചിട്ടുള്ള ധ്രുവന് ക്വീനിലെ നായക വേഷമാണ് വലിയ ശ്രദ്ധ നേടികൊടുത്ത്. അതിനു ശേഷം ചിൽഡ്രൻസ് പാർക്ക്, ഫൈനൽസ് എന്നീ ചിത്രങ്ങളിലും ധ്രുവൻ അഭിനയിച്ചിരുന്നു. മാമാങ്കം എന്ന എം പദ്മകുമാർ- മമ്മൂട്ടി ചിത്രത്തിൽ ആദ്യം ധ്രുവനെ കാസ്റ്റ് ചെയ്യുകയും, ആ ചിത്രത്തിന് വേണ്ടി വലിയ രീതിയിൽ ഫിസിക്കൽ മേക് ഓവർ നടത്തിയ ധ്രുവനെ അതിനു ശേഷം ആചിത്രത്തിൽ നിന്ന് ഒഴിവാക്കുകയും ചെയ്‌തത്‌ വലിയ വിവാദം ഉണ്ടാക്കിയിരുന്നു. ഖജുരാഹോ ഡ്രീംസ് എന്നൊരു ചിത്രവും ധ്രുവൻ അഭിനയിച്ചു വൈകാതെ ഷൂട്ടിംഗ് തുടങ്ങും എന്നും റിപ്പോർട്ടുകൾ പറയുന്നു.