രജനികാന്ത് ചിത്രത്തിൽ വില്ലനായി ബാല..!

മലയാളത്തിലെ പ്രശസ്ത നടന്മാരിൽ ഒരാളാണ് ബാല. നായകനായും വില്ലനായും സഹനടനായുമെല്ലാം അഭിനയിച്ചു തിളങ്ങിയിട്ടുള്ള ഈ താരം തമിഴ് ചിത്രങ്ങളിലും അഭിനയിച്ചു ശ്രദ്ധ നേടിയിട്ടുണ്ട്. ഈ അടുത്തിടെയാണ് ബാല രണ്ടാമതും വിവാഹിതനായി വാർത്തകളിൽ നിറഞ്ഞതു. ഏതായാലും തന്റെ കരിയറിലെ ഒരു പുതിയ ഘട്ടത്തിലേക്ക് കടക്കുകയാണ് ഇപ്പോൾ ഈ താരം. വമ്പൻ ചിത്രങ്ങളുടെ ഭാഗമായാണ് ഈ വർഷവും അടുത്ത വർഷവും ബാല എത്തുന്നത് എന്നാണ് സൂചന. വിശ്വാസം എന്ന മെഗാ ബ്ലോക്ക്ബസ്റ്ററിനു ശേഷം ശിവ ഒരുക്കിയ പുതിയ തമിഴ് ചിത്രത്തിലെ വില്ലൻ ബാല ആണ്. അണ്ണാത്തെ എന്ന് പേരിട്ടിരിക്കുന്ന ഈ ചിത്രത്തിൽ സൂപ്പർ സ്റ്റാർ രജനികാന്ത് ആണ് നായകനായി എത്തുന്നത്. ഈ വർഷം ദീപാവലിക്ക് അണ്ണാത്തെ റിലീസ് ചെയ്യുമെന്നുള്ള റിപ്പോർട്ടുകൾ ആണ് ഇപ്പോൾ ലഭിക്കുന്നത്. സൂപ്പർ സ്റ്റാർ രജനികാന്ത് ചിത്രത്തിലെ വില്ലൻ വേഷം തെന്നിന്ത്യയിൽ ബാലയുടെ താരമൂല്യം ഉയർത്തുമെന്നുറപ്പാണ്.

മലയാളത്തിൽ മമ്മൂട്ടി നായകനായ ബിലാൽ എന്ന ചിത്രത്തിലും ബാല അഭിനയിക്കും. അമൽ നീരദ് ഒരുക്കാൻ പോകുന്ന ഈ ചിത്രം ബിഗ് ബി എന്ന ചിത്രത്തിന്റെ രണ്ടാം ഭാഗമാണ്. കോവിഡ് പ്രതിസന്ധി മൂലം ഷൂട്ടിംഗ് നീണ്ടു പോകുന്ന ഈ ചിത്രം അടുത്ത വർഷം ആരംഭിക്കാൻ കഴിയുമെന്ന പ്രതീക്ഷയിലാണ് ആരാധകർ. രജനികാന്ത്, ബാല എന്നിവർ അഭിനയിക്കുന്ന അണ്ണാത്തെയിൽ വമ്പൻ താരനിരയാണ് അണിനിരക്കുന്നത്. ലേഡി സൂപ്പർ സ്റ്റാർ നയൻതാര, കീർത്തി സുരേഷ്, മീന, ഖുശ്‌ബു സുന്ദർ തുടങ്ങിയവരും പ്രകാശ് രാജ്, ബോളിവുഡ് താരം ജാക്കി ഷെറോഫ്, ജഗപതി ബാബു, സൂരി എന്നിവരും ഈ ചിത്രത്തിൽ അഭിനയിക്കുന്നുണ്ട്.