മരക്കാറിനെ കുറിച്ച് മനസ്സ് തുറന്നു ആക്ഷൻ കിംഗ് അർജുൻ…!!

മലയാള സിനിമാ പ്രേമികൾ ഏറെ കാത്തിരിക്കുന്ന ഒരു ചിത്രമാണ് കംപ്ലീറ്റ് ആക്ടർ മോഹൻലാൽ നായകനായി എത്തുന്ന പ്രിയദർശൻ ചിത്രമായ മരക്കാർ അറബിക്കടലിന്റെ സിംഹം. മലയാള സിനിമ കണ്ട എക്കാലത്തേയും ഏറ്റവും വലിയ ചിത്രമാണ് മരക്കാർ. നൂറു കോടിക്ക് മുകളിൽ ബഡ്ജറ്റിൽ ഒരുക്കുന്ന ഈ ചിത്രം അടുത്ത വർഷം മാർച്ചിൽ ആണ് റിലീസ് ചെയ്യുക. മോഹൻലാലിനൊപ്പം ബോളിവുഡ് താരം സുനിൽ ഷെട്ടി, തമിഴ് താരം അർജുൻ, പ്രഭു, മഞ്ജു വാര്യർ, പ്രണവ് മോഹൻലാൽ, കീർത്തി സുരേഷ്, കല്യാണി പ്രിയദർശൻ, മുകേഷ് തുടങ്ങി ഒരു വമ്പൻ താര നിര തന്നെ അണിനിരക്കുന്ന ഈ ചിത്രത്തിന്റെ ഒരു സ്നീക് പീക് വീഡിയോ സോഷ്യൽ മീഡിയയിൽ വലിയ തരംഗമാണ് ഉണ്ടാക്കിയത്. ഇപ്പോഴിതാ മരക്കാറിനെ കുറിച്ച് മനസ്സ് തുറക്കുകയാണ് ആക്ഷൻ കിംഗ് അർജുൻ.

ഒരു യൂട്യൂബ് ചാനലിന് നൽകിയ അഭിമുഖത്തിൽ ആണ് അർജുൻ ഈ കാര്യം പറയുന്നത്. ദിലീപിനൊപ്പം അർജുൻ അഭിനയിച്ച ജാക് ഡാനിയൽ എന്ന ചിത്രത്തിന്റെ പ്രമോഷന്റെ ഭാഗമായി നടത്തിയ അഭിമുഖത്തിൽ ആണ് അർജുൻ മരക്കാർ എന്ന ചിത്രത്തെ കുറിച്ചും പറയുന്നത്. ചിത്രം വളരെ നന്നായി വന്നിട്ടുണ്ട് എന്ന് പറയുന്ന അർജുൻ കൂടുതൽ വാചാലനാകുന്നത് സംവിധായകൻ പ്രിയദർശനെ കുറിച്ചാണ്. അത്രമാത്രം പ്ലാനിംഗ് ഉള്ള സംവിധായകൻ ആണ് പ്രിയദർശൻ എന്നും തന്റെ കരിയറിൽ താൻ ഇത്രമാത്രം പ്ലാനിംഗ് ഉള്ള മറ്റൊരു സംവിധായകന് ഒപ്പവും ജോലി ചെയ്തിട്ടില്ല എന്നും അർജുൻ പറയുന്നു.

മോഹൻലാൽ ആണ് മലയാളത്തിലെ തന്റെ ഇഷ്ട്ട നടൻ എന്നും തെങ്കാശിപ്പട്ടണം കണ്ടപ്പോൾ മുതൽ ദിലീപിനേയും ഇഷ്ട്ടമെന്നും അർജുൻ പറഞ്ഞു. മോഹൻലാൽ തന്റെ വലിയ സുഹൃത്ത് ആണെന്നും ഒരുമിച്ചു ചിത്രം ചെയ്യാൻ തങ്ങൾ എന്നും ആഗ്രഹിച്ചിരുന്നു എന്നും ഈ താരം വെളിപ്പെടുത്തുന്നു. തങ്ങൾ എപ്പോൾ പരസ്പരം കാണുമ്പോഴും ഒന്നിച്ചു ചിത്രം ചെയ്യുന്ന കാര്യമാണ് സംസാരിക്കാറു എന്നും അർജുൻ പറഞ്ഞു. മലയാളത്തിൽ മമ്മൂട്ടിക്ക് ഒപ്പം വന്ദേമാതരം എന്ന ഒരു ചിത്രത്തിലും അർജുൻ അഭിനയിച്ചിട്ടുണ്ട്. ശിവകാർത്തികേയനൊപ്പം അഭിനയിച്ച ഹീറോ എന്ന തമിഴ് ചിത്രമാണ് അർജുന്റെ ഈ വർഷത്തെ ഇനി വരുന്ന തമിഴ് റിലീസ്.