സോഷ്യൽ മീഡിയയിൽ തീയായ് പടർന്നു മോഹൻലാൽ; ആറാട്ടു ഒഫീഷ്യൽ പോസ്റ്ററിന് ഗംഭീര വരവേൽപ്പ്..!

ഇന്ത്യൻ സിനിമയുടെ കംപ്ലീറ്റ് ആക്ടർ മോഹൻലാൽ നായകനായി എത്തുന്ന പുതിയ ചിത്രമായ ആറാട്ടിന്റെ ഒഫീഷ്യൽ പോസ്റ്ററാണ് ഇപ്പോൾ സോഷ്യൽ മീഡിയയെ ത്രസിപ്പിക്കുന്നതു. മോഹൻലാൽ തന്നെ തന്റെ ഒഫീഷ്യൽ സോഷ്യൽ മീഡിയ പേജുകളിലൂടെ പുറത്തു വിട്ട പുതിയ പോസ്റ്റർ അക്ഷരാർത്ഥത്തിൽ സോഷ്യൽ മീഡിയയിൽ തീ പോലെ പടരുകയാണ്. കറുത്ത ഷർട്ടും മുണ്ടും ഉടുത്തു, ഒരു കിടിലൻ ആക്ഷൻ രംഗത്തിലെ, കളരിയടവുമായി നിൽക്കുന്ന മോഹൻലാലിന്റെ ചിത്രമാണ് ഈ പോസ്റ്ററിനെ സൂപ്പർ ഹിറ്റാക്കുന്നതു. ആക്ഷനും കോമെഡിക്കും പ്രാധാന്യം നൽകിയിരിക്കുന്ന ഈ ചിത്രം സംവിധാനം ചെയ്യുന്നത് ബി ഉണ്ണികൃഷ്ണനും രചിച്ചിരിക്കുന്നത് ഉദയ കൃഷ്‌ണയുമാണ്. ഹിപ്പോ പ്രൈം, മൂവി പേ മീഡിയ, ആർ ഡി ഇല്ല്യൂമിനേഷൻ എന്നിവയുടെ ബാനറിൽ സജീഷ് മഞ്ചേരി, ബി ഉണ്ണികൃഷ്ണൻ എന്നിവർ ചേർന്ന് നിർമ്മിക്കുന്ന ഈ ചിത്രത്തിന്റെ അവസാന ഷെഡ്യൂൾ ഈ മാസം കൊച്ചിയിൽ പൂർത്തിയാവും. മോഹൻലാൽ ആരാധകർക്കും മാസ്സ് ചിത്രങ്ങളുടെ ആരാധകർക്കും ഒരുപോലെ ആവേശം നൽകുന്ന ഒരു ചിത്രമാക്കി ആറാട്ടു ഒരുക്കാനാണ് അണിയറ പ്രവർത്തകരുടെ ശ്രമം.

നെയ്യാറ്റിൻകര ഗോപൻ എന്ന കഥാപാത്രമായാണ് ഈ ചിത്രത്തിൽ മോഹൻലാൽ എത്തുന്നത്. നെടുമുടി വേണു, സായ് കുമാര്‍, സിദ്ദിഖ്, വിജയരാഘവന്‍, ജോണി ആന്‍റണി, ഇന്ദ്രന്‍സ്, നന്ദു, ഷീല, സ്വാസിക, മാളവിക, രചന നാരായണന്‍കുട്ടി, ബിജു പപ്പൻ എന്നിവർ അഭിനയിക്കുന്ന ഈ ചിത്രത്തിലെ നായികാ വേഷം ചെയ്യുന്നത് ശ്രദ്ധ ശ്രീനാഥ് ആണ്. ബ്രഹ്മാണ്ഡ കന്നഡ ചിത്രം കെ ജി എഫിലെ ഗരുഡ എന്ന വേഷം ചെയ്ത റാമും ഈ ചിത്രത്തിൽ ഒരു പ്രധാന വേഷം ചെയ്യുന്നുണ്ട്. രാഹുൽ രാജ് ഗാനങ്ങളും പശ്ചാത്തല സംഗീതവുമൊരുക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് വിജയ് ഉലകനാഥും എഡിറ്റിംഗ് നിർവഹിക്കുന്നതു ഷമീർ മുഹമ്മദുമാണ്.