ആ സൂപ്പർ ഹിറ്റ് ചിത്രത്തിന്റെ രണ്ടാം ഭാഗം ഉടൻ ; ആകാംഷയോടെ ആരാധകർ..!

2020 ഇൽ റിലീസ് ചെയ്ത മലയാള ചിത്രങ്ങളിൽ ഏറ്റവും വലിയ വിജയം നേടിയ ചിത്രമാണ് മിഥുൻ മാനുവൽ തോമസ് രചിച്ചു സംവിധാനം ചെയ്ത അഞ്ചാം പാതിരാ. പ്രശസ്ത നടൻ കുഞ്ചാക്കോ ബോബൻ നായക വേഷത്തിലെത്തിയ ഈ ഇൻവെസ്റ്റിഗേഷൻ ത്രില്ലർ ഒരേ സമയം പ്രേക്ഷക പ്രീതിയും നിരൂപക പ്രശംസയും നേടി തിളക്കമുള്ള വിജയമാണ് കൈവരിച്ചത്. കുഞ്ചാക്കോ ബോബന്റെ കരിയറിലെ തന്നെ ഏറ്റവും വലിയ ബോക്സ് ഓഫിസ് വിജയം നേടിയെടുത്ത ഈ ചിത്രത്തിന് ഒരു രണ്ടാം ഭാഗം വരുന്നു എന്നുള്ള പ്രഖ്യാപനം പിന്നീട് ഉണ്ടായിരുന്നു. ഈ ചിത്രം നിർമ്മിച്ച ആഷിക് ഉസ്മാൻ തന്നെ നിർമ്മിക്കുന്ന ഈ രണ്ടാം ഭാഗം കുഞ്ചാക്കോ ബോബനെ തന്നെ നായകനാക്കി മിഥുൻ മാനുവൽ തോമസ് ആണ് ഒരുക്കാൻ പോകുന്നത്. ആറാം പാതിരാ എന്നാണ് ഈ രണ്ടാം ഭാഗത്തിന് അവർ നൽകിയിരിക്കുന്ന പേര്. കോവിഡ് പ്രതിസന്ധികൾ അവസാനിച്ചു കഴിഞ്ഞാൽ ഈ ചിത്രത്തിന്റെ ഷൂട്ടിംഗ് ആരംഭിക്കും എന്നാണ് സൂചന. പ്രശസ്ത പ്രൊഡക്ഷൻ കോൺട്രോളറും പ്രൊജക്റ്റ് ഡിസൈനറുമായ ബാദുഷയും ആറാം പാതിരാ വരുന്നു എന്നിട്ട സോഷ്യൽ മീഡിയ പോസ്റ്റിനു വലിയ ശ്രദ്ധയാണ് ലഭിക്കുന്നത്‌.

ഉണ്ണി മായാ, ശ്രീനാഥ് ഭാസി, രമ്യ നമ്പീശൻ, ഇന്ദ്രൻസ്, ഹരികൃഷ്ണൻ, ജിനു ജോസഫ്, ഷറഫുദീൻ, ദിവ്യ ഗോപിനാഥ്, അഭിരാം പൊതുവാൾ എന്നിവരും അഭിനയിച്ച അഞ്ചാം പാതിരാ ഒരു ഇൻവെസ്റ്റിഗേഷൻ ത്രില്ലർ ആണ്. കുഞ്ചാക്കോ ബോബൻ അവതരിപ്പിച്ച അൻവർ ഹുസൈൻ എന്ന ഒരു പോലീസ് കണ്‍സള്‍ട്ടിങ് ക്രിമിനോളജിസ്റ്റ് ആയ കഥാപാത്രം നടത്തുന്ന ഒരു ഇൻവെസ്റ്റിഗേഷൻ ആണ് ഈ ചിത്രം നമ്മുടെ മുന്നിൽ എത്തിച്ചത്. ആട് ഒരു ഭീകര ജീവിയാണ്, അലമാര, ആൻ മരിയ കലിപ്പിലാണ്, ആട് 2, അർജന്റീന ഫാൻസ്‌ കാട്ടൂർക്കടവ് എന്നിവയും ഒരുക്കിയ മിഥുൻ മാനുവൽ തോമസിന്റെ കരിയറിലെയും ഏറ്റവും വലിയ വിജയമാണ് അഞ്ചാം പാതിരാ നേടിയെടുത്തത്.