പൂരങ്ങളുടെ നാട്ടിൽ ചരിത്രം കുറിച്ചു ആറാട്ട്..!

സൂപ്പർ ഹിറ്റ് സംവിധായകനും രചയിതാവുമായ ബി ഉണ്ണികൃഷ്ണൻ സംവിധാനം ചെയ്ത മോഹൻലാൽ ചിത്രമായ ആറാട്ട് റിലീസിന് ഒരുങ്ങുകയാണ്. ഉദയ കൃഷ്ണ രചിച്ച ഈ മാസ്സ് എന്റർടൈനർ ചിത്രം ഫെബ്രുവരി പതിനെട്ടാം തീയതി ആണ് ആഗോള റിലീസ് ആയി എത്തുന്നത്. മലയാള സിനിമ കണ്ട ഏറ്റവും വലിയ റിലീസ് ആയി എത്തുന്ന ഈ ചിത്രം നിർമ്മിച്ചിരിക്കുന്നത് ബി ഉണ്ണികൃഷ്ണൻ, ശക്തി എന്നിവർ ചേർന്നാണ്. ഇപ്പോഴിതാ ഈ ചിത്രത്തിന്റെ അഡ്വാൻസ് ബുക്കിംഗ് ലോകം മുഴുവൻ ആരംഭിച്ചിരിക്കുകയാണ്. വലിയ പ്രേക്ഷക പ്രതികരണമാണ് ഇപ്പോൾ ഈ അഡ്വാൻസ് ബുക്കിങിന് ലഭിക്കുന്നത്. അതിൽ തന്നെ കേരളത്തിൽ തൃശൂരിലെ രാഗം തീയേറ്ററിൽ ചരിത്രം കുറിക്കുന്ന ടിക്കറ്റ് വിൽപ്പനയാണ് ഈ ചിത്രത്തിന് ലഭിച്ചു കൊണ്ടിരിക്കുന്നത്. കേരളത്തിലെ ഏറ്റവും മികച്ച തീയേറ്ററുകളിൽ ഒന്നായ രാഗത്തിലെ ഈ ചിത്രത്തിന്റെ ടിക്കറ്റുകൾ 15 മിനിറ്റ് കൊണ്ടാണ് വിറ്റു തീർന്നത്.

ഒരുപക്ഷേ മോഹൻലാൽ ചിത്രമായ മരക്കാറിന് ശേഷം ഇത്രയും അഭൂതപൂർവമായ അഡ്വാൻസ് ബുക്കിങ് ലഭിക്കുന്ന മലയാള ചിത്രം ആറാട്ടാവും എന്നു തന്നെ പറയാം. ഈ ചിത്രത്തിന്റെ ടീസർ, ട്രയ്ലർ, ഇതിന്റെ പോസ്റ്ററുകൾ എന്നിവ ഇപ്പോൾ സോഷ്യൽ മീഡിയയിൽ നിറഞ്ഞു നിൽക്കുകയാണ്. ഏറെക്കാലത്തിനു ശേഷമാണ് മലയാളത്തിൽ ഒരു പക്കാ മാസ്സ് മസാല എന്റർടൈനർ ഇറങ്ങുന്നത് എന്നത് കൊണ്ട് തന്നെ, വലിയ പ്രതീക്ഷകളോടെയാണ് ആരാധകരും സിനിമാ പ്രേമികളും ഈ ചിത്രം കാത്തിരിക്കുന്നത്. രാഹുൽ രാജ് സംഗീതം പകർന്ന ഈ ചിത്രത്തിന് കാമറ ചലിപ്പിച്ചത് വിജയ് ഉലകനാഥ് ആണ്. ഷെമീർ മുഹമ്മദ് എഡിറ്റ് ചെയ്ത ഈ ചിത്രത്തിൽ സംഗീത മാന്ത്രികൻ എ ആർ റഹ്മാൻ അതിഥി വേഷത്തിൽ എത്തുന്നു എന്നതും ആരാധകരെ ആവേശം കൊള്ളിക്കുന്ന കാര്യമാണ്.