ചിരിയിലൂടെ പ്രേക്ഷക ഹൃദയം കീഴടക്കി ആന അലറലോടലറൽ..!

നവാഗതനായ ദിലീപ് മേനോൻ സംവിധാനം ചെയ്ത ആന അലറലോടലറൽ ആണ് ഇന്നലെ കേരളത്തിലെ തീയേറ്ററുകളിൽ പ്രദർശനത്തിന് എത്തിയ ചിത്രങ്ങളിൽ ഒന്ന് . വിനീത് ശ്രീനിവാസൻ, സുരാജ് വെഞ്ഞാറമ്മൂട്, അനു സിതാര എന്നിവർ പ്രധാന വേഷങ്ങളിൽ എത്തിയ ഈ ചിത്രം ഇപ്പോൾ മികച്ച പ്രേക്ഷകാഭിപ്രായം നേടി മുന്നേറുകയാണ്. ഹാഷിം എന്ന കഥാപാത്രത്തെ ആണ് വിനീത് ശ്രീനിവാസൻ ഈ ചിത്രത്തിൽ അവതരിപ്പിച്ചിരിക്കുന്നത്. പ്രേക്ഷകരെ ഒരുപാട് ചിരിപ്പിച്ചു കൊണ്ടാണ് ആക്ഷേപ ഹാസ്യത്തിന്റെ മേമ്പൊടി ചാലിച്ചു ഒരുക്കിയ ഈ ചിത്രം മുന്നേറുന്നത്. ശരത് ബാലൻ ആണ് ഈ ചിത്രം രചിച്ചിരിക്കുന്നത്. പോയട്രി ഫിലിമ്സിന്റെ ബാനറിൽ സിബി കെ തോട്ടുപുറം, നാവിസ് സേവ്യർ എന്നിവർ ചേർന്ന് നിർമ്മിച്ച ഈ ചിത്രത്തിന് ആദ്യ ഷോ മുതൽ മികച്ച പ്രേക്ഷക പ്രതികരണം ആണ് ലഭിക്കുന്നത്.

വിനീത് ശ്രീനിവാസൻ മികച്ച പ്രകടനം കാഴ്ച വെച്ച ഈ ചിത്രത്തിൽ കയ്യടി നേടിയത് സുരാജ് വെഞ്ഞാറമ്മൂട് ആണ്. ഈ വർഷം തൊണ്ടിമുതലും ദൃക്സ്കാഷിയും വർണ്യത്തിൽ ആശങ്ക എന്നീ ചിത്രങ്ങൾക്ക് ശേഷം സുരാജ് അവതരിപ്പിച്ച ഏറ്റവും മികച്ച വേഷമാണ് ഈ ചിത്രത്തിലേതു. ഇവർക്കൊപ്പം ഹാരിഷ് കണാരൻ, ഇന്നസെന്റ് , ബിജു കുട്ടൻ, മാമുക്കോയ തുടങ്ങി പ്രേക്ഷകരെ പൊട്ടിച്ചിരിപ്പിക്കുന്ന ഒരുപാട് താരങ്ങൾ ഈ ചിത്രത്തിൽ ഉണ്ട്. അവരെല്ലാവരും ചേർന്ന് ഒരു ചിരിപ്പൂരം തന്നെയാണ് നമ്മുക്ക് മുന്നിൽ ഒരുക്കിയത് എന്ന് പറയാം. കുടുംബ പ്രേക്ഷകർ ഈ ചിത്രത്തെ ഇപ്പോഴേ ഇരു കയ്യും നീട്ടി സ്വീകരിച്ചു കഴിഞ്ഞു.

ഷാൻ റഹ്മാൻ ഒരുക്കിയ സംഗീതവും ദീപു എസ് ഉണ്ണി ഒരുക്കിയ ദൃശ്യങ്ങളും മികച്ചു നിന്നു. അതുപോലെ തന്നെ മനോജിന്റെ എഡിറ്റിംഗ് ആണ് ഈ ചിത്രത്തിന് മികച്ച സാങ്കേതിക നിലവാരം പകർന്നു കൊടുത്ത്. ഒരു ആനയും നിർണായക കഥാപാത്രം ആയി എത്തുന്ന ഈ ചിത്രം കുട്ടികളെ ഒരുപാട് ആകർഷിച്ചു തുടങ്ങിയിട്ടുണ്ട്.