ത്രീഡിയിൽ ഷാജി പാപ്പനും കൂട്ടരും; ആരാധകരുടെ പ്രതീക്ഷകൾ വർധിപ്പിച്ച് ആട് 3 അപ്‌ഡേറ്റ് പുറത്തു വിട്ട് നിർമ്മാതാവ്

പ്രശസ്ത സംവിധായകനും രചയിതാവുമായ മിഥുൻ മാനുവൽ തോമസ് സംവിധായകനായി അരങ്ങേറിയ ചിത്രമാണ് ആട് ഒരു ഭീകര ജീവിയാണ്. ജയസൂര്യ നായകനായ, ഫ്രൈഡേ ഫിലിം ഹൌസ് നിർമ്മിച്ച ഈ ചിത്രം തീയേറ്ററുകളിൽ വലിയ ഓളം സൃഷ്ടിച്ചില്ലെങ്കിലും, അതിനു ശേഷം മിനി സ്ക്രീനിലും സോഷ്യൽ മീഡിയയിലും തരംഗമായി മാറിയിരുന്നു. അത്കൊണ്ട് തന്നെ ഇതിന് ഒരു രണ്ടാം ഭാഗവുമായി അണിയറ പ്രവർത്തകർ മുന്നോട്ടു വന്നു. ഫ്രൈഡേ ഫിലിം ഹൗസിന്റെ ബാനറിൽ വിജയ് ബാബു നിർമ്മിച്ച ഈ മിഥുൻ മാനുവൽ തോമസ്- ജയസൂര്യ ചിത്രം ബ്ലോക്ക്ബസ്റ്റർ വിജയമാണ് നേടിയെടുത്തത്. ജയസൂര്യയുടെ കരിയറിലെ തന്നെ ഏറ്റവും വലിയ ഹിറ്റായി ഈ ചിത്രം മാറി. അതിനു ശേഷം അവർ ഇതിന്റെ മൂന്നാം ഭാഗമായി ആട് 3 എന്ന ചിത്രവും പ്രഖ്യാപിച്ചു. ത്രീഡിയിൽ ഒരുക്കുന്ന ബിഗ് ബഡ്ജറ്റ് ചിത്രമായാണ് ആട് 3 പ്രഖ്യാപിച്ചത്.

ഇപ്പോഴിതാ ഈ ചിത്രം വരുമോ എന്ന ചോദ്യത്തിന്, ആട് 3 ഉടനെ ഉണ്ടാകുമെന്ന മറുപടിയാണ് നിർമ്മാതാവ് വിജയ് ബാബു നൽകിയിരിക്കുന്നത്. ഈ സീരിസിൽ ഷർബത് ഷമീർ എന്ന സൂപ്പർ ഹിറ്റ് പോലീസ് കഥാപാത്രത്തേയും വിജയ് ബാബു അവതരിപ്പിച്ചിരുന്നു. ആട് 2 ന്റെ വിജയാഘോഷ ചടങ്ങിൽ വെച്ചാണ് ആട് 3 പ്രഖ്യാപിച്ചിരുന്നത്. ജയസൂര്യ, മിഥുൻ മാനുവൽ തോമസ് എന്നിവർ തങ്ങളുടെ ഇപ്പോഴത്തെ ചിത്രങ്ങൾ പൂർത്തിയാക്കി കഴിഞ്ഞാൽ ആട് 3 ആരംഭിക്കുമെന്നാണ് സൂചന. ജയസൂര്യ, വിജയ് ബാബു എന്നിവർക്കൊപ്പം വിനായകൻ, ധർമജൻ ബോൾഗാട്ടി, സൈജു കുറുപ്പ്, ഭഗത് മാനുവൽ, ഇന്ദ്രൻസ്, സുധി കോപ്പ, തുടങ്ങി ഒരു വലിയ താരനിരതന്നെ ഈ ചിത്രത്തിന്റെ ഭാഗമാണ്.