ആദിയുടെ രണ്ടാമത്തെ ടീസർ സോഷ്യൽ മീഡിയ ഇളക്കി മറിക്കുന്നു; മാസ്സ് രംഗങ്ങളുമായി പ്രണവ് മോഹൻലാൽ ..!

പ്രണവ് മോഹൻലാൽ ചിത്രം ആദിയുടെ രണ്ടാമത്തെ ടീസർ ഇന്ന് രാവിലെയാണ് എത്തിയത്. റിലീസ് ചെയ്ത നിമിഷം മുതൽ സോഷ്യൽ മീഡിയ അക്ഷരാർഥത്തിൽ ഇളകി മറിയുകയാണ് എന്ന് പറയാം. വൈകാരിക രംഗങ്ങൾ നിറഞ്ഞ ഒരു ട്രെയ്‌ലറും ഗാനവും അതുപോലെ ഒരു സിംഗിൾ ഷോട്ട് മാത്രമുള്ള ടീസറുമാണ് ആദിയുടേതായി ഇതുവരെ നമ്മൾ കണ്ടതെങ്കിൽ മാസ്സ് രംഗങ്ങൾ നിറഞ്ഞ, പ്രണവിന്റെ കിടിലൻ ആക്ഷൻ രംഗങ്ങൾ നിറഞ്ഞ ഒരു ഞെട്ടിക്കുന്ന ടീസർ ആണ് ഇപ്പോൾ അണിയറ പ്രവർത്തർ പുറത്തിറക്കിയിരിക്കുന്നത്. പ്രണവിന്റെ പാർക്കർ രംഗം ഈ ടീസറിൽ കാണാം എന്നുള്ളതാണ് ഇതിന്റെ പ്രത്യേകത. ഗംഭീര പ്രേക്ഷക പ്രതികരണം നേടുന്ന ഈ ടീസർ ആരാധകരെ ത്രസിപ്പിക്കുകയാണ്. യുവാക്കളെ ഒരുപാട് ആകർഷിക്കും ഈ മാസ്സ് രംഗങ്ങൾ എന്നുള്ളത് സംശയമില്ലാത്ത കാര്യമാണ്. ആദിയുടെ ട്രൈലെർ കുടുംബ പ്രേക്ഷകർക്ക് വേണ്ടിയുള്ളതായിരുന്നു എങ്കിൽ ഈ പുതിയ ടീസർ യുവാക്കളെ ലക്ഷ്യമിട്ടാണ് എത്തിയിരിക്കുന്നത്.

ജീത്തു ജോസഫ് രചനയും സംവിധാനവും നിർവഹിച്ചു ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിച്ച ഈ ഫാമിലി ആക്ഷൻ ത്രില്ലർ ഈ വരുന്ന ജനുവരി 26 മുതൽ തീയേറ്ററുകളിൽ എത്തും.ക്ലീൻ യു സർട്ടിഫിക്കറ്റ് ആണ് സെൻസർ കഴിഞ്ഞപ്പോൾ ആദിക്ക് ലഭിച്ചത്. നായകനായുള്ള ആദ്യ ചിത്രം റിലീസ് ചെയ്യും മുൻപേ കേരളത്തിൽ അങ്ങോളമിങ്ങോളം ഫാൻസ്‌ അസോസിയേഷനുകൾ രൂപപ്പെട്ടു കഴിഞ്ഞു പ്രണവ് മോഹൻലാലിന്. പ്രേക്ഷകർ ഏറെ പ്രതീക്ഷയോടെയാണ് ആദി എന്ന ഈ ചിത്രത്തിനായി കാത്തിരിക്കുന്നത്. ഏതായാലും ഈ രണ്ടാമത്തെ റ്റീസർ കൂടി വന്നതോടെ ആദിയെ കുറിച്ചുള്ള പ്രതീക്ഷകൾ ആകാശം മുട്ടിയിരിക്കുകയാണ്.