25 വർഷം മുൻപ് മോഹൻലാലിന് തന്റെ കല്യാണക്കുറി അയച്ച ആന്ധ്രയിൽ നിന്നുള്ള ആരാധകൻ; മോഹൻലാലിന്റെ മറുപടി ശ്രദ്ധ നേടുന്നു

കംപ്ലീറ്റ് ആക്ടർ മോഹൻലാൽ കേരളത്തിൽ മാത്രമല്ല കേരളത്തിന് പുറത്തും ഏറ്റവും കൂടുതൽ ആരാധകരുള്ള താരമാണ്. ആന്ധ്രയിലും കർണാടകയിലും തമിഴ് നാട്ടിലും അതുപോലെ നോർത്ത് ഇന്ത്യൻ സംസ്ഥാനങ്ങളിലും വമ്പൻ മാർക്കറ്റുള്ള സൂപ്പർ താരമാണ് മോഹൻലാൽ. ഒരുപാട് വർഷങ്ങൾക്കു മുൻപേ തന്നെ മോഹൻലാൽ കേരളത്തിന് പുറത്തു വളരെയധികം പ്രശസ്തനാണ്. ഇപ്പോഴിതാ ആന്ധ്ര സ്വദേശിയായ ഒരു കടുത്ത മോഹൻലാൽ ആരാധകനാണ് സോഷ്യൽ മീഡിയയുടെ ശ്രദ്ധ നേടുന്നത്. അദ്ദേഹത്തിന്റെ മകൻ തന്റെ അച്ഛനെ കുറിച്ച് പറഞ്ഞു കൊണ്ട് ഇട്ട ട്വിറ്റെർ പോസ്റ്റ് ഏറെ ശ്രദ്ധ നേടുകയാണ്. അതിനു മോഹൻലാൽ കൊടുത്ത മറുപടിയും സോഷ്യൽ മീഡിയയിൽ വൈറലായി കഴിഞ്ഞു. ശ്രീപതി ഹരിബാബു എന്ന വിജയവാഡ സ്വേദേശിയായ ആളാണ് തന്റെ അച്ഛന്റെ മോഹൻലാൽ ആരാധനയെ കുറിച്ച് പറയുന്നത്. തന്റെ അച്ഛൻ താങ്കളുടെ വളരെ വലിയ ആരാധകനാണെന്നും 25 വർഷം മുൻപ് അച്ഛൻ തന്റെ കല്യാണക്കുറി താങ്കളുടെ വിലാസം കണ്ടു പിടിച്ചു അയച്ചിരുന്നു എന്നും ശ്രീപതി ട്വിറ്ററിലൂടെ മോഹൻലാലിനോട് പറയുന്നു. മാർച്ച് ഒന്നിന് ശ്രീപതി ഇട്ട ട്വിറ്റെർ പോസ്റ്റിൽ പറയുന്നത് അന്ന് തന്റെ അച്ഛന്റെ ജന്മദിനമായിരുന്നു എന്നും കൂടിയാണ്.

അതിനു മറുപടിയായി മോഹൻലാൽ ശ്രീപതിയുടെ അച്ഛന് സന്തോഷകരമായ ഒരു ജന്മദിനം ആശംസിക്കുകയും ചെയ്തു. അദ്ദേഹത്തിന് എല്ലാ സന്തോഷവും ദൈവാനുഗ്രഹങ്ങളും ഉണ്ടാകട്ടെ എന്നും മോഹൻലാൽ തന്റെ മറുപടി ട്വീറ്റിൽ പറയുന്നു. തന്റെ അച്ഛൻ മോഹൻലാലിന്റെ ചിത്രത്തിന് മുന്നിലിരിക്കുന്ന ഒരു ഫോട്ടോയും ശ്രീപതി പങ്കു വെച്ചിട്ടുണ്ട്. ഹരിബാബു ശ്രീപതി എന്നാണ് ഈ കടുത്ത മോഹൻലാൽ ആരാധകനായ ആന്ധ്ര സ്വദേശിയുടെ പേര്. മോഹൻലാലിന്റെ ചിത്രം ലാമിനേറ്റ് ചെയ്ത് തന്റെ വീട്ടിൽ സൂക്ഷിച്ചിരിക്കുന്ന അദ്ദേഹം ആ ചിത്രവുമായി ബന്ധപ്പെട്ട തന്റെ മധുരമായ ഓർമകളും ഫേസ്ബുക് വഴി പങ്കു വെച്ചിട്ടുണ്ട്.