സൂര്യയുടെ പിറന്നാളിന് ‘എൻ.ജി.ക്കെ’ ടീമിന്റെ വമ്പൻ സർപ്രൈസ്; ആരാധകർ ആകാംക്ഷയിൽ…

സൂര്യയെ നായകനാക്കി സെൽവരാഘവൻ സംവിധാനം ചെയ്യുന്ന ചിത്രമാണ് ‘എൻ.ജി.ക്കെ’. സൂര്യയുടെ അവസാനമായി പുറത്തിറങ്ങിയ ചിത്രമായിരുന്നു ‘താന സെർന്താ കൂട്ടം’. സെൽവരാഘവന്റെ റീലീസിനായി ഒരുങ്ങുന്ന ചിത്രമാണ് ‘നെഞ്ചം മരപ്പതിലയ്’. സൂര്യയും- സെൽവരാഘവനും ആദ്യമായി ഒന്നിക്കുന്ന ചിത്രം എന്ന നിലയിൽ സിനിമ പ്രേമികളും ആരാധകരും ഒരെപ്പോലെ കാത്തിരിക്കുന്ന ചിത്രം കൂടിയാണ് ‘എൻ.ജി.ക്കെ’. സായ് പല്ലവിയും, രാകുൽ പ്രീതുമാണ് നായികമാരായി പ്രത്യക്ഷപ്പെടുന്നത്. കെ. വി ആനന്ദ്‌ ചിത്രമായ സൂര്യ37 ന്റെ ഷൂട്ടിംഗ് തിരക്കിലാണ് സൂര്യ, മോഹൻലാൽ- സൂര്യ ആദ്യമായി ഒന്നിക്കുന്ന ചിത്രം ലണ്ടനിൽ ചിത്രീകരണം ആരംഭിച്ചു കഴിഞ്ഞു. ‘തീരൻ അധികാരം ഒൻട്രാ’ എന്ന ചിത്രത്തിന് ശേഷം എസ്. ആർ പ്രഭു നിർമ്മിക്കുന്ന ചിത്രം കൂടിയാണ് ‘എൻ.ജി.ക്കെ’.

ചിത്രത്തിന്റെ ആദ്യ പോസ്റ്റർ സോഷ്യൽ മീഡിയയിൽ തരംഗം സൃഷ്ട്ടിച്ചിരുന്നു. ചെഗുവേരയുടെ മുഖ സാദൃശ്യമുള്ള ലുക്കിലായിരുന്നു സൂര്യ പോസ്റ്ററിൽ പ്രത്യക്ഷപ്പെട്ടിരുന്നത്. ചിത്രത്തിന്റെ പുതിയ അപ്ഡേറ്റുമായി നിർമ്മാതാവ് എസ്. ആർ പ്രഭു വന്നിരിക്കുകയാണ്. തന്റെ ട്വിറ്റർ അക്കൗണ്ടിൽ എൻ.ജി.ക്കെ സിനിമയുടെ പുതിയ അപ്ഡേറ്റ് സൂര്യയുടെ പിറന്നാൾ ദിനത്തിൽ ഉണ്ടാവുമെന്നാണ് എസ്.ആർ പ്രഭു പറഞ്ഞിരിക്കുന്നത്. ചിത്രത്തിന്റെ ടീസർ അല്ലെങ്കിൽ പുതിയ പോസ്റ്റർ ആയിരിക്കും സൂര്യയുടെ പിറന്നാൾ ദിനത്തിൽ പുറത്തുവിടുക എന്നാണ് അടുത്ത റിപ്പോർട്ടുകൾ സൂചിപ്പിക്കുന്നത്. ഒരു പരീക്ഷണ ചിത്രം എന്ന നിലയിൽ സിനിമ പ്രേമികൾക്ക് ഒരു പുത്തൻ സിനിമ അനുഭവം തന്നെയായിരിക്കും. തമിഴ് നാട്ടിലെ രാഷ്ട്രീയം തന്നെയാണ് ചിത്രത്തിൽ ചർച്ച ചെയ്യുന്നത്. എൻ.ജി.ക്കെ യുടെ സംഗീതം ഒരുക്കിയിരിക്കുന്നത് യുവാൻ ശങ്കർ രാജയാണ്. ഛായാഗ്രഹണം നിർവഹിച്ചിരിക്കുന്നത് ശിവകുമാർ വിജയനാണ്. പ്രവീനാണ് എഡിറ്റിംഗ് വർക്കുകൾ ചെയ്തിരിക്കുന്നത്. വിജയ് നായകനാവുന്ന ‘സർക്കാർ’ സിനിമയോടൊപ്പം ദിവാലിക്ക് ‘എൻ.ജി.ക്കെ’ പ്രദർശനത്തിനെത്തും.