’96’ ലെ ഗൗരി ഇനി മലയാളത്തിന്‍റെയും നായിക ; അനുഗ്രഹീത ആന്റണിയുടെ ഫസ്റ്റ് ലുക്ക് പോസ്റ്റർ പ്രേക്ഷകമനസ്സ് കീഴടക്കുന്നു…

സണ്ണി വെയ്നെ നായകനാക്കി നവാഗതനായ പ്രിൻസ് ജോയ് സംവിധാനം ചെയ്തിരിക്കുന്ന ചിത്രമാണ് അനുഗ്രഹീത ആന്റണി. ഏറെ പ്രതീക്ഷയോടെ കാത്തിരുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ സണ്ണിയുടെ സുഹൃത്ത് കൂടിയായ ദുൽഖർ സൽമാനാണ് ഇന്നലെ പുറത്തുവിട്ടത്. നവീൺ ടി. മണിലാലാണ് ചിത്രത്തിന് വേണ്ടി തിരക്കഥ രചിച്ചിരിക്കുന്നത്. ജിഷ്ണു ആർ നായരും അശ്വിൻ പ്രകാശ് എന്നിവർ ചേർന്നാണ് ചിത്രത്തിന് കഥ ഒരുക്കിയിരിക്കുന്നത്. 96 എന്ന തമിഴ് ചിത്രത്തിലൂടെ സൗത്ത് ഇന്ത്യൻ സിനിമ പ്രേമികളുടെ മനസ്സ് കീഴടക്കിയ ഗൗരി ജി കിഷനാണ് ചിത്രത്തിൽ നായിക വേഷം കൈകാര്യം ചെയ്തിരിക്കുന്നത്. അനുഗ്രഹീത ആന്റണി എന്ന ചിത്രത്തിലൂടെ താരം മലയാള സിനിമയിലേക്ക് ചുവടുവെക്കുകയാണ്. ചിത്രത്തിന്റെ ഫസ്റ്റ് ലുക്ക് പോസ്റ്റർ ഏറെ പ്രതീക്ഷ നൽകുന്നതാണ്.

നായകനെയും നായികയും കേന്ദ്രികരിച്ചു ഒരു റൊമാന്റിക് ഫീൽ പോസ്റ്റർ സമ്മാനിക്കുന്നുണ്ട്. ഒരുപാട് വൈകാരിക രംഗങ്ങളും ഫാന്റസിയും കോർത്തിണക്കികൊണ്ടാണ് ചിത്രം അണിയിച്ചൊരുക്കിയിരിക്കുന്നത്. സണ്ണി വെയ്നിന്റെ പ്രണയിനിയായാണ് ഗൗരി ചിത്രത്തിൽ പ്രത്യക്ഷപ്പെടുന്നത്. സുരാജ് വെഞ്ഞാറമൂട്, സിദ്ദിഖ് എന്നിവർ ചിത്രത്തിൽ വളരെ പ്രധാനപ്പെട്ട വേഷങ്ങൾ കൈകാര്യം ചെയ്യുന്നുണ്ട്. അനുഗ്രഹീത ആന്റണി എന്ന ചിത്രത്തിൽ ഒരു പട്ടിയും ഒരു ഒഴിച്ചു കൂടാനാവാത്ത ഒരു കഥാപാത്രമായി വരുന്നുണ്ട്. സെൽവകുമാറാണ് സിനിമയുടെ ഛായാഗ്രഹണം നിർവഹിച്ചിരിക്കുന്നത്. എഡിറ്റിംഗ് വർക്കുകൾ കൈകാര്യം ചെയ്തിരിക്കുന്നത് അർജ്ജുൻ ബെനാണ്. അരുൺ മുരളീധരനാണ് സംഗീത സംവിധാനം നിർവഹിച്ചിരിക്കുന്നത്.