ആ സൂപ്പർഹിറ്റ് പൃഥ്വിരാജ് ചിത്രങ്ങൾ ചെയ്യേണ്ടിയിരുന്നത് ഞാനായിരുന്നു: അനൂപ് മേനോൻ പറയുന്നു

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ നായകനായി എത്തിയ രണ്ടു സൂപ്പർ ഹിറ്റ് ചിത്രങ്ങളാണ് സെവൻത് ഡേ, എന്ന് നിന്റെ മൊയ്‌ദീൻ എന്നിവ. ശ്യാം ധർ എന്ന സംവിധായകൻ അരങ്ങേറ്റം കുറിച്ച സെവൻത് ഡേ ഒരു ത്രില്ലർ ചിത്രമായാണ് ഒരുക്കിയത്. 2014 റിലീസ് ചെയ്ത ഈ ചിത്രത്തിൽ പൃഥ്വിരാജ് സുകുമാരനൊപ്പം ടോവിനോ തോമസും അഭിനയിച്ചിരുന്നു. അതുപോലെ 2015 ഇൽ റിലീസ് ചെയ്തു ബ്ലോക്ക്ബസ്റ്റർ ഹിറ്റായ ചിത്രമാണ് നവാഗതനായ ആർ എസ് വിമൽ ഒരുക്കിയ എന്ന് നിന്റെ മൊയ്‌തീൻ. മലയാളികൾക്ക് സുപരിചതമായ മൊയ്‌തീൻ- കാഞ്ചനമാല പ്രണയത്തിന്റെ ചലച്ചിത്രാവിഷ്കാരമായിരുന്നു ഈ ചിത്രം. പാർവതി നായികാ വേഷം ചെയ്ത ഈ ചിത്രത്തിലും ടോവിനോ തോമസ് അഭിനയിച്ചിരുന്നു. എന്നാൽ ഈ രണ്ടു ചിത്രങ്ങളിലും നായകനായി ആദ്യ ചോയ്സ് പൃഥ്വിരാജ് ആയിരുന്നില്ല. ഈ രണ്ടു ചിത്രങ്ങളും ആദ്യം തന്റെ മുന്നിലാണ് വന്നതെന്ന് വെളിപ്പെടുത്തുകയാണ് മലയാളത്തിലെ പ്രശസ്ത നടനും സംവിധായകനും രചയിതാവുമായ അനൂപ് മേനോൻ.

സെവൻത് ഡേ ആദ്യം തനിക്കു മുന്നിലാണ് വന്നതെന്നും, തങ്ങൾ ഏതാണ്ട് ഒരു വർഷത്തോളം ആ ചിത്രത്തിന്റെ കാര്യങ്ങളുമായി മുന്നോട്ടു പോയിരുന്നുവെന്നും അനൂപ് മേനോൻ പറയുന്നു. എന്നാൽ പിന്നീട് നിർമ്മാതാവുമായ ബന്ധപെട്ടു ചില പ്രശ്നങ്ങൾ ഉണ്ടായപ്പോഴാണ് അത് മാറിപ്പോയതെന്നും അനൂപ് മേനോൻ പറയുന്നു. അതുപോലെ എന്ന് നിന്റെ മൊയ്‌ദീൻ താനും മമത മോഹൻദാസും അഭിനയിക്കാനിരുന്ന ചിത്രമായിരുവെന്നും, ഇടയ്ക്കു ശങ്കർ രാമകൃഷ്ണൻ ആ ചിത്രം കുറച്ചു രചിക്കുകയും ചെയ്തിരുന്നുവെന്നും അനൂപ് മേനോൻ വെളിപ്പെടുത്തി. എന്നാൽ ഇന്ന് നമ്മൾ കണ്ട എന്ന് നിന്റെ മൊയ്‌തീൻ പോലെയല്ല അന്ന് ആർ എസ് വിമൽ അത് പ്ലാൻ ചെയ്തിരുന്നതെന്നും, ബ്യൂട്ടിഫുൾ ഒക്കെ പോലത്തെ ഒരു കൊച്ചു ചിത്രമായിരുന്നു അന്ന് പ്ലാൻ ചെയ്തതെന്നും അനൂപ് മേനോൻ വിശദീകരിച്ചു. പൃഥ്വിരാജ് വന്നതോടെയാണ് ആ ചിത്രം വലുതായതെന്നും അദ്ദേഹം പറഞ്ഞു. റെഡ് എഫ് എമ്മിന് നൽകിയ അഭിമുഖത്തിലാണ് അനൂപ് മേനോൻ ഇത് പുറത്ത് പറഞ്ഞത്.