ജിമിക്കി കമ്മലിന് പ്രണവ് മോഹന്‍ലാലിന്‍റെ ഡാന്‍സ്

ഈ വര്‍ഷത്തെ ഏറെ ഹിറ്റായ ഗാനമാണ് മോഹന്‍ലാല്‍ നായകനാകുന്ന വെളിപാടിന്‍റെ പുസ്തകത്തിലെ “ജിമിക്കി കമ്മല്‍” ഗാനം. സോഷ്യല്‍ മീഡിയയില്‍ മാത്രമല്ല കോളേജുകളിലും ഓഫീസുകളിലുമെല്ലാം ഈ ഗാനം തരംഗം തീര്‍ത്തു കൊണ്ടിരിക്കുകയാണ്. ഒട്ടേറെ വേര്‍ഷനുകളും ഈ പാട്ടിനൊത്തുള്ള ഡാന്‍സുമൊക്കെ സോഷ്യല്‍ മീഡിയയില്‍ വൈറല്‍ ആയിരുന്നു. ഇപ്പോള്‍ ജിമിക്കി കമ്മല്‍ ഗാനത്തിന് ഒരു സിനിമ സെറ്റ് ചുവടു വെക്കുന്ന വീഡിയോ സോഷ്യല്‍ മീഡിയയില്‍ എത്തിയിരിക്കുകയാണ്.

ഈ സിനിമ സെറ്റ് മറ്റേതുമല്ല മോഹന്‍ലാലിന്‍റെ മകന്‍ പ്രണവ് മോഹന്‍ലാല്‍ നായകന്‍ ആകുന്ന ആദിയുടെ ഷൂട്ടിങ്ങ് സെറ്റിലാണ് ഈ ഡാന്‍സ് നടന്നത്.

തിരുവോണമായ ഇന്ന്‍ ആദിയുടെ സെറ്റില്‍ ചിത്രത്തിലെ അണിയറ പ്രവര്‍ത്തകരും താരങ്ങളും ചേര്‍ന്നാണ് ഡാന്‍സ് നടത്തിയത്. ഒപ്പം ഡാന്‍സ് കളിക്കാനായി പ്രണവ് മോഹന്‍ലാലുമെത്തി.

സംവിധായകന്‍ ജിത്തു ജോസഫ് തന്നെയാണ് ഈ വീഡിയോ ആരാധകരുമായി പങ്കുവെച്ചത്.

പ്രണവ് നായകനാകുന്ന ആദ്യ ചിത്രമാണ് ആദി. ചിത്രത്തിന്‍റെ ഷൂട്ടിങ്ങ് പുരോഗമിച്ചു കൊണ്ടിരിക്കുകയാണ്. ഈ വര്‍ഷത്തെ ക്രിസ്തുമസ് റിലീസായി ചിത്രം തിയേറ്ററില്‍ എത്തുമെന്നാണ് പ്രതീക്ഷിക്കുന്നത്.