ഞണ്ടുകളുടെ നാട്ടില്‍ ഒരിടവേളയ്ക്ക് അഭിനന്ദനവുമായി പുലിമുരുകന്‍ സംവിധായകന്‍

നിവിന്‍ പോളി നായകനായി എത്തിയ പുതിയ ചിത്രം ഞണ്ടുകളുടെ നാട്ടില്‍ ഒരിടവേള കഴിഞ്ഞ ദിവസം തിയേറ്ററുകളില്‍ എത്തി. പൂര്‍ണ്ണമായും കുടുംബ പ്രേക്ഷകരെ രസിപ്പിക്കുന്ന രീതിയിലാണ് ചിത്രം ഒരുക്കിയിരിക്കുന്നത്.

ഞണ്ടുകളുടെ നാട്ടില്‍ ഒരിടവേളയ്ക്ക് അഭിനന്ദനവുമായി പുലിമുരുകന്‍ സംവിധായകന്‍ വൈശാഖും എത്തിയിരിക്കുകയാണ്.

“പ്രിയ അല്‍ത്താഫിന്, അഭിനന്ദനങ്ങള്‍. ‘ഞണ്ടുകളുടെ നാട്ടില്‍’ കണ്ടു. തുടക്കക്കാരന്റെ ഒരു പിഴവുകളുമില്ലാതെ കയ്യൊതുക്കത്തോടെ സംവിധാനം ചെയ്തിരിക്കുന്നു. പ്രമേയത്തിലും ,അതിന്റെ അവതരണത്തിലും, പാലിച്ചിരുന്ന പോസിറ്റീവ് സമീപനം. സിനിമയെ കൂടുതല്‍ ഹൃദ്യമാക്കിയിട്ടുണ്ട് നിവിനും കൂട്ടുകാര്‍ക്കും അഭിനന്ദനങ്ങള്‍” തന്‍റെ ഒഫീഷ്യല്‍ ഫേസ്ബുക്ക് പേജ് വഴിയായിരുന്നു വൈശാഖിന്റെ പ്രതികരണം.

സംവിധായകന്‍ അല്‍ത്താഫും ജോര്‍ജ്ജ് കോരയും ചേര്‍ന്നാണ് ഞണ്ടുകളുടെ നാട്ടില്‍ ഒരിടവേളയുടെ തിരക്കഥ രചിച്ചത്. പുതുമുഖം ഐശ്വര്യ ലക്ഷ്മിയാണ് ചിത്രത്തില്‍ നായികയായി എത്തുന്നത്. പഴയകാല നായിക ശാന്തി കൃഷ്ണ വര്‍ഷങ്ങള്‍ക്ക് ശേഷം വെള്ളിത്തിരയിലേക്ക് തിരിച്ചെത്തുന്ന ചിത്രവുമാണ് ഇത്.

ഞാന്‍ സ്റ്റീവ് ലോപ്പസ് എന്ന രാജീവ് രവി ചിത്രത്തിലൂടെ നായികയായി എത്തിയ അഹാന കൃഷ്ണ ചിത്രത്തില്‍ നിവിന്‍ പോളിയുടെ സഹോദരി വേഷത്തില്‍ എത്തുന്നു. ലാല്‍, സൈജു കുറുപ്പ്, ശ്രീന്താ, ദിലീഷ് പോത്തന്‍ തുണ്ടങ്ങിയ താരങ്ങളും ചിത്രത്തില്‍ വേഷമിടുന്നു.