വൈശാലിയും ഋഷ്യശൃംഗനും വീണ്ടും തരംഗമാകുന്നു; പുതിയ ഫോട്ടോഷൂട്ട് ചിത്രങ്ങളിതാ..!

അന്തരിച്ചു പോയ പ്രശസ്ത സംവിധായകൻ ഭരതൻ ഒരുക്കിയ വൈശാലി എന്ന സൂപ്പർ ഹിറ്റ് ചിത്രം സിനിമാ പ്രേമികളായ ഓരോ മലയാളികൾക്കും ഏറെ പരിചിതമാണ്. എം. ടി. വാസുദേവൻ നായർ- ഭരതൻ കൂട്ടുകെട്ടിൽ പിറന്ന ഈ ചിത്രത്തിൽ വൈശാലി ആയി സുപര്ണ ആനന്ദും ഋഷ്യശൃംഗനായി സഞ്ജയ് മിശ്രയുമാണ് അഭിനയിച്ചത്. അംഗ രാജ്യത്തു മഴ ലഭിക്കുന്നതിനായി ഋഷ്യശൃംഗനെ വശീകരിച്ചു കൊണ്ട് വരാൻ പോകുന്ന വൈശാലിയുടെ കഥയും അതിൽ മേല്പറഞ്ഞ നടീനടമാർ നടത്തിയ പ്രകടനവും ഇന്നും മലയാളികളുടെ മനസ്സിലുണ്ട്. ഇപ്പോഴിതാ വൈശാലി എന്ന സിനിമയിലെ ആ കഥാപാത്രങ്ങളുടെ ഒരു പുനരാവിഷ്കരണം നടത്തിയിരിക്കുകയാണ് മിഥുൻ സർക്കാര എന്ന യുവാവ്. ദമ്പതികളായ അഭിജിത് ജിത്തുവും മാകു മായയുമാണ് ഫോട്ടോഷൂട്ടിലെ മോഡല്‍സ് ആയി വന്നിരിക്കുന്നത്. ഏതായാലും വൈശാലിയും ഋഷ്യശൃംഗനും ആയുള്ള ഇരുവരുടെയും ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറൽ ആവുകയാണ്.

മിഥുൻ സർക്കരയുടേതാണ് ഈ ആശയവും ഫോട്ടോസും. ഈ ഫോട്ടോകൾക്ക് വേണ്ടി വസ്ത്രാലങ്കാരം നടത്തിയത് സുകീഷ് കോസ്റ്റ്യുംസ് ആണ്. വെെശാലിയും ഋഷ്യശൃംഗനും തമ്മിലുള്ള പ്രണയരംഗങ്ങളാണ് മിഥുൻ സർക്കാര ആവിഷ്കരിച്ചിരിക്കുന്നത്. വൈശാലിയിലെ ഈ രംഗങ്ങൾ പകർത്തണമെന്ന ആശയം മിഥുൻ സുഹൃത്തുക്കളോട് പങ്കു വെച്ചപ്പോൾ അവർ സമ്മതിക്കുകയിരുന്നു. 1988 ഇൽ റിലീസ് ചെയ്ത വൈശാലി എന്ന ചിത്രത്തിന്റെ ക്യാമറ ചലിപ്പിച്ചത് മധു അമ്പാട്ട് ആണെങ്കിൽ, എഡിറ്റിംഗ് നിർവഹിച്ചത് സംവിധായകനായ ഭരതൻ തന്നെയായിരുന്നു. അറ്റ്ലസ് രാമചന്ദ്രൻ നിർമ്മിച്ച ഈ ചിത്രത്തിൽ ബാബു ആന്റണി, വി കെ ശ്രീരാമൻ, അശോകൻ, ഗീത, നെടുമുടി വേണു എന്നിവരും പ്രധാന വേഷങ്ങൾ ചെയ്തു. രവി ഒരുക്കിയ ഈ ചിത്രത്തിലെ ഗാനങ്ങൾ വമ്പൻ ഹിറ്റായിരുന്നു.