ബോക്സ് ഓഫീസിൽ ഗംഭീര ഓപ്പണിങ്ങുമായി പാപ്പൻ; ആദ്യ ദിന കളക്ഷൻ റിപ്പോർട്ട് അറിയാം

ആക്ഷൻ സൂപ്പർ സ്റ്റാർ സുരേഷ് ഗോപി നായകനായ ഏറ്റവും പുതിയ ചിത്രമായ പാപ്പൻ പ്രേക്ഷകർ ഇരു കയ്യും നീട്ടി സ്വീകരിച്ചിരിക്കുകയാണ്. ജോഷി സംവിധാനം ചെയ്ത ഈ മാസ്സ് ക്രൈം ത്രില്ലർ ചിത്രത്തിന് ആദ്യ ദിനം വലിയ പ്രേക്ഷക പിന്തുണയാണ് ലഭിച്ചത്. ആദ്യ ഷോ മുതൽ തന്നെ ഗംഭീര പ്രേക്ഷക പ്രതികരണം ലഭിച്ച ഈ ചിത്രത്തിന് ഇന്നലെ മാത്രം അന്പതിനു മുകളിൽ എക്സ്ട്രാ ഷോകളാണ് രാത്രി ചാർട്ട് ചെയ്യേണ്ടി വന്നത്. വമ്പൻ കപ്പാസിറ്റി തീയേറ്ററുകളിൽ വരെ ഹൗസ്ഫുൾ ഷോകൾ ലഭിച്ച പാപ്പൻ പതുക്കെ കത്തി കയറുന്ന കാഴ്ചയാണ് നമുക്കിപ്പോൾ കാണാൻ സാധിക്കുന്നത്. ജോഷി- സുരേഷ് ഗോപി കൂട്ടുകെട്ടിൽ നിന്ന് വീണ്ടും ഒരു സൂപ്പർ ഹിറ്റ് നമ്മുക്ക് ലഭിക്കുകയാണെന്നു സംശയമില്ലാതെ തന്നെ പറയാൻ സാധിക്കും. ചിത്രത്തിന്റെ ആദ്യ ദിന കളക്ഷൻ സംബന്ധിച്ചുള്ള ഏറ്റവും പുതിയ റിപ്പോർട്ടുകൾ ഇപ്പോൾ വരുന്നുണ്ട്.

ട്രേഡ് അനലിസ്റ്റുകൾ വിലയിരുത്തുന്നത് പ്രകാരം, ഈ ചിത്രം കേരളത്തിൽ നിന്ന് ആദ്യ ദിനം നേടിയത് ഏകദേശം മൂന്നു കോടിയോളം രൂപയാണ്. സുരേഷ് ഗോപിയുടെ കരിയറിലെ തന്നെ ഏറ്റവും മികച്ച ബോക്സ് ഓഫിസ് ഓപ്പണിങ് ആണ് ഈ ചിത്രം നേടിയിരിക്കുന്നത്. ഈ വർഷം റിലീസ് ചെയ്തതതിൽ രണ്ടര കോടിക്ക് മുകളിൽ ആദ്യ ദിനം ഓപ്പണിങ് നേടിയ ചുരുക്കം ചില മലയാള ചിത്രങ്ങളിൽ ഒന്ന് കൂടിയായി പാപ്പൻ മാറിയിട്ടുണ്ട്. ആർ ജെ ഷാൻ രചിച്ച ഈ ചിത്രത്തിൽ സുരേഷ് ഗോപിയുടെ മകൻ ഗോകുൽ സുരേഷ്, നൈല ഉഷ, നീത പിള്ളൈ എന്നിവരും പ്രധാന വേഷങ്ങൾ ചെയ്തിട്ടുണ്ട്. എബ്രഹാം മാത്യു മാത്തൻ എന്ന റിട്ടയേർഡ് പോലീസ് ഓഫീസർ ആയാണ് സുരേഷ് ഗോപി ഈ ചിത്രത്തിൽ വേഷമിട്ടിരിക്കുന്നത്.