ഓണക്കാലത്തും ചരിത്രമായി ജയിലർ; കേരളത്തിൽ നിന്ന് മാത്രം 50 കോടി; കളക്ഷൻ റിപ്പോർട്ട് ഇതാ.

ഇന്നേ വരെ ഒരു തമിഴ് ചിത്രവും കേരളത്തിൽ നിന്ന് 50 കോടി രൂപ കളക്ഷൻ നേടിയിട്ടില്ല എന്ന ചരിത്രം തിരുത്തി കുറിച്ച് കൊണ്ട് സൂപ്പർ സ്റ്റാർ രജനികാന്ത് നായകനായ ജയിലർ. കഴിഞ്ഞ ദിവസം കേരളത്തിൽ നിന്ന് മാത്രം 50 കോടി ഗ്രോസ് എന്ന നേട്ടത്തിലേക്ക് ജയിലർ എത്തിയതോടെ കേരളത്തിലെ തമിഴ് ഇൻഡസ്ട്രി ഹിറ്റായി ജയിലർ മാറി. കമൽ ഹാസൻ- ലോകേഷ് ചിത്രമായ വിക്രമായിരുന്നു ഇതിന് മുമ്പ് കേരളത്തിലെ തമിഴ് ഇൻഡസ്ട്രി ഹിറ്റ്. നാൽപ്പത് കോടിയാണ് വിക്രം കേരളത്തിൽ നിന്നും നേടിയ ഗ്രോസ്. കേരളത്തിൽ മാത്രം അൻപത് കോടി നേടിയ ആദ്യ തമിഴ് ചിത്രമെന്നതിനൊപ്പം തന്നെ, ഇവിടെ ആ നേട്ടം കൈവരിക്കുന്ന ആറാമത്തെ ചിത്രമെന്ന പ്രത്യേകതയും ജയിലറിനുണ്ട്.

പുലി മുരുകൻ, ബാഹുബലി 2 , ലൂസിഫർ, കെ ജി എഫ് 2 , 2018 എന്നിവയാണ് ഇതിന് മുൻപ് കേരളത്തിൽ നിന്ന് 50 കോടി ഗ്രോസ് നേടിയ ചിത്രങ്ങൾ. മലയാളത്തിന്റെ മഹാനടൻ കംപ്ലീറ്റ് ആക്ടർ മോഹൻലാലിൻറെ സാന്നിധ്യവും ജയിലറിന് തുണയായി. മോഹൻലാൽ അവതരിപ്പിച്ച മാത്യു എന്ന അതിഥി വേഷം തരംഗമായി മാറിയതോടെ, കുടുംബ പ്രേക്ഷകരും ജയിലർ ഏറ്റെടുക്കുകയായിരുന്നു. അതോടെയാണ് റിലീസ് ചെയ്ത് 15 ദിവസം കൊണ്ട് തന്നെ 50 കോടിയിലേക്കു ചിത്രം കുതിച്ചത്. നെൽസൺ ദിലീപ്കുമാർ രചിച്ചു സംവിധാനം ചെയ്ത ഈ ചിത്രം നിർമ്മിച്ചത് സൺ പിക്ചേഴ്സും, ഇത് കേരളത്തിൽ വിതരണം ചെയ്തത് ശ്രീ ഗോകുലം മൂവീസുമാണ്. ആഗോള തലത്തിൽ 530 കോടിയോളമാണ് ഈ ചിത്രം ഇതുവരെ നേടിയ ഗ്രോസ് കളക്ഷൻ.