ഇത് പുതിയ റെക്കോർഡ്; പുഷ്പ കളക്ഷൻ റിപ്പോർട്ട് പുറത്ത്..!

തെലുങ്കിലെ ഐക്കൺ സ്റ്റാർ അല്ലു അർജുൻ നായകനായി എത്തിയ പുതിയ ചിത്രമാണ് പുഷ്പ. ഈ കഴിഞ്ഞ വെള്ളിയാഴ്ച ലോകം മുഴുവൻ തെലുങ്ക്, തമിഴ്, ഹിന്ദി, മലയാളം, കന്നഡ എന്നിങ്ങനെ അഞ്ചു ഭാഷകളിൽ ആയി റിലീസ് ചെയ്ത ഈ ചിത്രം അല്ലു അർജുന്റെ കരിയറിലെ ഏറ്റവും വലിയ ചിത്രവും ഏറ്റവും വലിയ റിലീസുമാണ്. രണ്ടു ഭാഗങ്ങൾ ആയി എത്തുന്ന ഈ ചിത്രത്തിന്റെ ആദ്യ ഭാഗമാണ് ഇപ്പോൾ പുറത്തു വന്നിരിക്കുന്നത്. സുകുമാർ രചിച്ചു സംവിധാനം ചെയ്ത ഈ ചിത്രം സമ്മിശ്ര പ്രതികരണമാണ് നേടുന്നത് എങ്കിലും ബോക്‌സ് ഓഫീസിൽ ഗംഭീര പ്രകടനമാണ് കാഴ്ച വെക്കുന്നത്. ഇപ്പോൾ ഈ ചിത്രത്തിന്റെ ആദ്യ മൂന്ന് ദിവസത്തെ വേൾഡ് വൈഡ് കലക്ഷൻ റിപ്പോർട്ട് പുറത്തു വന്നിരിക്കുകയാണ്.

173 കോടി രൂപയാണ് ഈ ചിത്രം ആദ്യ 3 ദിവസം കൊണ്ട് നേടിയത് എന്നാണ് റിപ്പോർട്ടുകൾ പറയുന്നത്. ഇത് 2021 ലെ ഇന്ത്യൻ സിനിമകൾ നേടിയതിൽ ഏറ്റവും വലിയ വീക്കെൻഡ് കളക്ഷൻ ആണെന്നാണ് സൂചന. 2021 ലെ ഏറ്റവും വലിയ ഹിറ്റുകൾ അക്ഷയ് കുമാർ നായകനായ ബോളിവുഡ് ചിത്രം സൂര്യവംശിയും വിജയ് നായകനായ തമിഴ് ചിത്രം മാസ്റ്ററും ആണ്. ആ ചിത്രങ്ങൾ ആദ്യ വീക്കെൻഡ് നേടിയ കലക്ഷൻ പോയിന്റ് ആണ് പുഷ്പ മറികടന്നത് എന്നാണ് റിപ്പോർട്ടുകൾ പറയുന്നത്. മലയാളി താരം ഫഹദ് ഫാസിൽ വില്ലൻ വേഷത്തിൽ എത്തുന്ന ഈ ചിത്രത്തിലെ നായികാ വേഷം ചെയ്തത് രശ്മിക മന്ദന ആണ്. മൈത്രി മൂവി മേക്കേഴ്‌സ് നിർമ്മിച്ച പുഷ്പ ഒരു പക്ക അല്ലു അർജുൻ ഷോ ആണെന്നാണ് പ്രേക്ഷകർ അഭിപ്രായപ്പെടുന്നത്.