മരക്കാർ ആദ്യ ദിന വേൾഡ് വൈഡ് കളക്ഷൻ റിപ്പോർട്ട് പുറത്തു; കുറിച്ചത് പുതിയ ചരിത്രം..!

കംപ്ലീറ്റ് ആക്ടർ മോഹൻലാൽ ഒരിക്കൽ കൂടി തന്റെ താരമൂല്യം എന്തെന്ന് കാണിച്ചു തരുന്ന കാഴ്ച്ചയാണ് ഇപ്പോൾ മലയാള സിനിമ കാണുന്നത്. മലയാളത്തിലെ ഏറ്റവും വലിയ ചിത്രമായ, മോഹൻലാൽ നായകനായ, മരക്കാർ ഡിസംബർ രണ്ടിന് ആണ് റിലീസ് ചെയ്തത്. സമ്മിശ്ര പ്രതികരണങ്ങൾ നേടിയിട്ടും ഈ ചിത്രം ബോക്സ് ഓഫീസിൽ വമ്പൻ കുതിപ്പാണ് നടത്തുന്നത്. ആദ്യ ദിനം കേരളത്തിൽ നിന്ന് മാത്രം ആറു കോടി എഴുപതു ലക്ഷം രൂപ നേടി റെക്കോർഡ് ഇട്ട ഈ ചിത്രം ഇപ്പോൾ ആഗോള കളക്ഷൻ ആയി 20 കോടിക്ക് മുകളിൽ നേടി ചരിത്രം കുറിച്ചിരിക്കുകയാണ്. മലയാളത്തിൽ നിന്ന് ആദ്യമായാണ് ഒരു ചിത്രം ആഗോള കളക്ഷൻ ആയി 20 കോടിക്ക് മുകളിൽ നേടുന്നത്. ഇതിനു മുൻപ് 19 കോടി നേടിയ കുറുപ്പും, 18 കോടി നേടിയ ഒടിയനും ആയിരുന്നു ആദ്യ രണ്ടു സ്ഥാനങ്ങളിൽ നിന്നതു. ഇപ്പോൾ ആ സ്ഥാനം മരക്കാർ നേടിക്കഴിഞ്ഞു.

കേരളത്തിൽ നിന്ന് ആറു കോടി എഴുപതു ലക്ഷത്തോളം നേടിയ മരക്കാർ, ഗൾഫിൽ നിന്നും നേടിയത് പത്തു കോടിയോളമാണ്. റസ്റ്റ് ഓഫ് ഇന്ത്യ, റസ്റ്റ് ഓഫ് ദി വേൾഡ് മാര്ക്കറ്റില് നിന്ന് നാലു കോടിക്ക് മുകളിലും നേടിയാണ് ഈ ചിത്രം ആദ്യ ദിനത്തിലെ ആഗോള കളക്ഷൻ ഇരുപതിന്‌ മുകളിൽ എത്തിച്ചു റെക്കോർഡ് സൃഷ്ടിച്ചത്. ബ്രിട്ടൻ, ഓസ്ട്രേലിയ, യു എ ഇ എന്നിവിടങ്ങളിലും ആദ്യ ദിന ഗ്രോസിൽ മരക്കാർ മലയാളത്തിലെ റെക്കോർഡ് ആണ് നേടിയത്. പ്രിയദർശൻ ഒരുക്കിയ ഈ ചിത്രം നിർമ്മിച്ചത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ്. കുഞ്ഞാലി മരക്കാർ നാലാമൻ എന്ന ചരിത്ര കഥാപാത്രത്തിന്റെ കഥയാണ് ഈ ചിത്രം പറഞ്ഞത്.