എങ്ങും ഹൗസ്ഫുൾ ഷോകളുമായി റോഷാക്ക്; ആദ്യ വീക്കെൻഡ് കളക്ഷൻ റിപ്പോർട്ട് ഇതാ

മെഗാസ്റ്റാർ മമ്മൂട്ടി നായകനായി എത്തിയ റോഷാക്ക് എന്ന ചിത്രം ഇപ്പോൾ മികച്ച വിജയം നേടിയാണ് മുന്നേറുന്നത്. നിസാം ബഷീർ സംവിധാനം ചെയ്ത ഈ ചിത്രം ഒരു സൈക്കോളജിക്കൽ ത്രില്ലറായാണ് ഒരുക്കിയിരിക്കുന്നത്. ആദ്യ ദിനം തൊട്ട് മികച്ച ബോക്സ് ഓഫിസ് പ്രകടനം നടത്തുന്ന ഈ ചിത്രത്തിന്റെ ആദ്യ വീക്കെൻഡ് കേരളാ കളക്ഷൻ പുറത്ത് വന്നുകഴിഞ്ഞു. ആദ്യ വീക്കെൻഡിൽ റോഷാക്ക് നേടിയ കേരളാ കളക്ഷൻ ഒൻപത് കോടിക്ക് മുകളിലാണ്. ആദ്യ ദിനം രണ്ട് കോടി അറുപത് ലക്ഷം നേടിയ ഈ ചിത്രം രണ്ടാം ദിനം മൂന്ന് കോടി പത്ത് ലക്ഷവും മൂന്നാം ദിനം മൂന്ന് കോടി മുപ്പത് ലക്ഷവുമാണ് കേരളത്തിൽ നിന്ന് നേടിയ ഗ്രോസ് കളക്ഷൻ. ആദ്യ വീക്കെൻഡിൽ നിന്ന് ഈ ചിത്രം നേടിയ കേരളാ ഷെയർ നാല് കോടി പതിനാറ് ലക്ഷം രൂപയാണ്. റസ്റ്റ് ഓഫ് ഇന്ത്യ, ഓവർസീസ് മാർക്കറ്റിൽ നിന്നു കൂടെയുള്ള കളക്ഷൻ പരിശോദിച്ചാൽ ഏകദേശം പതിനെട്ട് മുതൽ ഇരുപത് കോടിയോളം ആഗോള ഗ്രോസ് ഈ ചിത്രം നേടിയിട്ടുണ്ടാകുമെന്നാണ് പ്രാഥമിക വിലയിരുത്തൽ.

തുടക്കം മുതൽ തന്നെ പ്രേക്ഷകരെ മിസ്റ്ററി നിറഞ്ഞ ഒരന്തരീക്ഷത്തിലേക്കു കൂട്ടികൊണ്ടു പോവുന്ന രീതിയിൽ കഥ പറയുന്ന ഈ ചിത്രം യുവ പ്രേക്ഷകരെ ഏറെയാകര്ഷിക്കുന്നുണ്ട്. ലൂക്ക് ആന്റണി എന്ന കഥാപാത്രമായാണ് മമ്മൂട്ടി ഈ ചിത്രത്തിൽ അഭിനയിച്ചിരിക്കുന്നത്. അദ്ദേഹത്തോടൊപ്പം ഷറഫുദീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, സഞ്ജു ശിവറാം, കോട്ടയം നസീർ എന്നിവരും അഭിനയിക്കുന്ന ഈ ചിത്രം അഡ്‌വെഞ്ചേർസ് ഓഫ് ഓമനക്കുട്ടൻ, ഇബിലീസ് എന്നീ ആസിഫ് അലി ചിത്രങ്ങൾ രചിച്ച സമീർ അബ്ദുൾ ആണ് രചിച്ചിരിക്കുന്നത്. താൻ പുതുതായി ആരംഭിച്ച മമ്മൂട്ടി കമ്പനി എന്ന സിനിമാ നിർമ്മാണ ബാനറിൽ മമ്മൂട്ടി തന്നെ നിർമ്മിച്ച ചിത്രമാണ് റോഷാക്ക്.