ബോക്സ് ഓഫീസിൽ റെക്കോർഡുകൾ കടപുഴക്കി കെ ജി എഫ് 2; ആദ്യ നാലു ദിവസത്തെ ആഗോള കളക്ഷൻ റിപ്പോർട്ട് ഇതാ..!

ഇന്ത്യൻ സിനിമയിൽ പുതിയ ബോക്സ് ഓഫീസ് സമവാക്യങ്ങൾ കുറിച്ച് കൊണ്ട് മുന്നേറുകയാണ് കെ ജി എഫ് 2 . ഗംഭീര പ്രേക്ഷക പ്രതികരണം നേടുന്ന ഈ ചിത്രം ലോകമെമ്പാടും ത്രസിപ്പിക്കുന്ന വിജയമാണ് നേടുന്നത്. ഇപ്പോഴിതാ ഈ ചിത്രത്തിന്റെ ആദ്യ നാലു ദിവസത്തെ ബോക്സ് ഓഫീസ് കളക്ഷൻ പുറത്തു വന്നിരിക്കുകയാണ്. ആദ്യ നാലു ദിവസം കൊണ്ട് 550 കോടിയോളമാണ് ഈ ചിത്രം നേടിയ ആഗോള കളക്ഷൻ. അതിൽ നാനൂറ്റി നാൽപതു കോടിയോളം ഈ ചിത്രം നേടിയത് ഡൊമസ്റ്റിക് മാർക്കറ്റിൽ നിന്നാണ്. നൂറു കോടിക്ക് മുകളിൽ ആണ് ഈ ചിത്രത്തിന്റെ ഓവർസീസ് ഗ്രോസ്. കെ ജി എഫിന്റെ ആദ്യ ഭാഗം ആകെ നേടിയ ഗ്രോസ് ഇരുനൂറു കോടി ആണെങ്കിൽ ഈ രണ്ടാം ഭാഗം ആദ്യ വീക്കെൻഡിൽ നിന്ന് തന്നെ അഞ്ഞൂറ്റിയന്പത് കോടി നേടി ചരിത്രം കുറിച്ചിരിക്കുകയാണ്.

ദങ്കൽ, ബാഹുബലി 2, ആർ ആർ ആർ എന്നിവക്ക് ശേഷം ആയിരം കോടി ഗ്രോസ് നേടുന്ന ഇന്ത്യൻ ചിത്രമായി കെ ജി എഫ് 2 മാറും എന്നാണ് പ്രതീക്ഷ. കന്നഡ സിനിമയിലെ ആദ്യത്തെ നൂറു കോടി, ഇരുനൂറു കോടി ഗ്രോസ് നേടിയ ചിത്രമായിരുന്നു കെ ജി എഫിന്റെ ആദ്യ ഭാഗം എങ്കിൽ, ഇപ്പോൾ ആ ഇൻഡസ്ട്രിയിൽ ആദ്യത്തെ മുന്നൂറു കോടി, നാനൂറു കോടി, അഞ്ഞൂറ് കോടി എന്നിവ എത്തിച്ചത് കെ ജി എഫ് 2 ആണ്. ഇനി ഇതിനൊരു മൂന്നാം ഭാഗം കൂടി വരുന്നു എന്നത് കൊണ്ട് തന്നെ കെ ജി എഫ് സീരിസ് കന്നഡ സിനിമയെ ഇന്ത്യൻ സിനിമയുടെ തലപ്പത്തു എത്തിക്കാനുള്ള സാദ്ധ്യതകൾ വളരെ കൂടുതലാണ്. പ്രശാന്ത് നീൽ ഒരുക്കിയ ഈ ചിത്രം നിർമ്മിച്ചത് ഹോംബാലെ ഫിലിംസും ഇതിലെ നായക വേഷം ചെയ്തത് റോക്കിങ് സ്റ്റാർ യഷുമാണ്.