5 ദിവസം കൊണ്ട് തമിഴ്‌നാട്ടിൽ നിന്ന് മാത്രം 43 കോടി; ധനുഷ് ചിത്രം തിരുച്ചിത്രമ്പലം മെഗാ ഹിറ്റിലേക്ക്

തമിഴകത്തിന്റെ യുവ സൂപ്പർ താരം ധനുഷ് നായകനായി എത്തിയ ഏറ്റവും പുതിയ ചിത്രമാണ് തിരുച്ചിത്രമ്പലം. കഴിഞ്ഞയാഴ്ച റിലീസ് ചെയ്ത ഈ ഫീൽ ഗുഡ് എന്റെർറ്റൈനെറിനു മികച്ച പ്രേക്ഷക പ്രതികരണവും നിരൂപക പ്രശംസയുമാണ് ലഭിച്ചത്. പഴം എന്ന കേന്ദ്ര കഥാപാത്രമായി എത്തുന്ന ധനുഷിന്റെ ഗംഭീര പ്രകടനമാണ് ഈ ചിത്രത്തിന്റെ ഹൈലൈറ്റ്. മിത്രൻ ജവഹർ സംവിധാനം ചെയ്ത ഈ ചിത്രത്തിൽ നിത്യ മേനോനാണ് മറ്റൊരു പ്രധാന കഥാപാത്രത്തെ അവതരിപ്പിച്ചത്. ബോക്സ് ഓഫീസിലും ഗംഭീര പ്രകടനം കാഴ്ച വെക്കുന്ന ഈ ചിത്രത്തിന്റെ തമിഴ്നാട് കളക്ഷൻ റിപ്പോർട്ട് പുറത്തു വന്നിരിക്കുകയാണ്. ആദ്യ അഞ്ച് ദിവസം കൊണ്ട് തമിഴ്‌നാട്ടിൽ നിന്ന് മാത്രം 43 കോടിക്ക് മുകളിലാണ് ഈ ചിത്രം നേടിയ കളക്ഷൻ. ആഗോള ഗ്രോസ് അമ്പത് കോടിയും നേരത്തെ തന്നെ പിന്നിട്ട ഈ ചിത്രം ഇപ്പോൾ ധനുഷിന്റെ മികച്ച വിജയങ്ങളുടെ ലിസ്റ്റിലേക്കാണ് കുതിക്കുന്നത്.

ഭാരതി രാജ, പ്രകാശ് രാജ്, രാശി ഖന്ന, പ്രിയ ഭവാനി ശങ്കർ തുടങ്ങിയവരാണ് ചിത്രത്തിലെ മറ്റു പ്രധാന അഭിനേതാക്കൾ. ഫുഡ് ഡെലിവറി ബോയ് ആയി ധനുഷ് അഭിനയിച്ചിരിക്കുന്നു ഈ ചിത്രത്തിൽ കയ്യടി നേടുന്ന മറ്റൊരാൾ നിത്യ മേനൻ അവതരിപ്പിച്ച ശോഭന എന്ന കഥാപാത്രമാണ്. പ്രകാശ് രാജ്- ധനുഷ് ടീമിന്റെ അച്ഛൻ- മകൻ മുഹൂർത്തങ്ങളും ഭാരതി രാജയുടെ മുത്തച്ഛൻ വേഷവും ഈ ചിത്രത്തെ പ്രേക്ഷകരിലേക്ക് അടുപ്പിക്കുന്നുണ്ട്. ഏറെ നാളുകൾക്കു ശേഷമാണ് ധനുഷിന്റെ ഒരു ഫീൽ ഗുഡ് ചിത്രം വരുന്നത് എന്നതും ഈ ചിത്രത്തിന് വലിയ സ്വീകരണം ലഭിക്കുന്നതിന് കാരണമായിട്ടുണ്ട്. അനിരുദ്ധ് രവിചന്ദര് ഒരുക്കിയ ഇതിലെ ഗാനങ്ങളും സൂപ്പർ ഹിറ്റാണ്.