100 കോടി നേട്ടത്തിലെത്തി മെഗാസ്റ്റാർ ചിത്രം

തെന്നിന്ത്യൻ സിനിമയുടെ മെഗാസ്റ്റാറായ ചിരഞ്ജീവി നായകനായി എത്തിയ ഏറ്റവും പുതിയ ചിത്രമാണ് ഗോഡ്ഫാദർ. തമിഴ് സംവിധായകനായ മോഹൻ രാജ സംവിധാനം ചെയ്ത ചിത്രം ഈ കഴിഞ്ഞ ഒക്ടോബർ അഞ്ചിനാണ് ആഗോള റിലീസായി എത്തിയത്. സമ്മിശ്ര പ്രതികരണം നേടിയ ഈ ചിത്രം ഇപ്പോൾ ബോക്സ് ഓഫീസിൽ മികച്ച പ്രകടനമാണ് കാഴ്ച വെക്കുന്നത്. ആഗോള കളക്ഷനായി നൂറു കോടിയാണ് ഈ ചിരഞ്ജീവി ചിത്രം പിന്നിട്ടിരിക്കുന്നത്. ബോളിവുഡ് മെഗാസ്റ്റാർ സൽമാൻ ഖാൻ അതിഥി വേഷത്തിലെത്തിയ ഈ ചിത്രത്തിലെ നായികാ വേഷം ചെയ്തിരിക്കുന്നത് ലേഡി സൂപ്പർസ്റ്റാർ നയൻതാരയാണ്. ബ്ലോക്ക്ബസ്റ്റർ മലയാള ചിത്രം ലൂസിഫറിന്റെ തെലുങ്ക് റീമേക്കാണ് ഗോഡ്ഫാദർ. കംപ്ലീറ്റ് ആക്ടർ മോഹൻലാലിനെ നായകനാക്കി പൃഥ്വിരാജ് സുകുമാരൻ സംവിധാനം ചെയ്ത ഈ ചിത്രം മലയാളത്തിലും 100 കോടി ക്ലബിൽ ഇടം പിടിച്ച ചിത്രമാണ്.

മലയാളത്തിൽ മോഹൻലാൽ ചെയ്ത സ്റ്റീഫൻ നെടുമ്പള്ളി എന്ന കഥാപാത്രമാണ് തെലുങ്കിൽ ബ്രഹ്മ എന്ന പേരിൽ ചിരഞ്ജീവി അവതരിപ്പിച്ചത്. പൃഥ്വിരാജ് മലയാളത്തിൽ ചെയ്ത അതിഥി വേഷം തെലുങ്കിൽ സൽമാൻ ഖാനും ചെയ്തു. മലയാളത്തിൽ വിവേക് ഒബ്‌റോയ്, മഞ്ജു വാര്യർ എന്നിവർ ചെയ്ത വേഷങ്ങൾ തെലുങ്കിൽ അവതരിപ്പിച്ചത് യഥാക്രമം സത്യദേവ്, നയൻ‌താര എന്നിവരാണ്. എസ് തമൻ സംഗീതമൊരുക്കിയ ഗോഡ്ഫാദറിൽ സമുദ്രക്കനി, മുരളി ശർമ്മ, പുരി ജഗന്നാഥ്, ഹാരിഷ് ഉത്തമൻ, ജയപ്രകാശ്, സച്ചിൻ കടേക്കർ, വംശി കൃഷ്ണ, നാസർ എന്നിവരും അഭിനയിച്ചിരിക്കുന്നു. കോണിഡാല പ്രൊഡക്ഷൻ കമ്പനിയും സൂപ്പർ ഗുഡ് ഫിലിംസും ചേർന്നാണ് ഗോഡ്ഫാദർ നിർമ്മിച്ചിരിക്കുന്നത്. മലയാളത്തിൽ മുരളി ഗോപി രചിച്ച ലൂസിഫർ നിർമ്മിച്ചത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ്.