കറ പിടിച്ച പല്ലും, ക്രൗര്യം ഒളിപ്പിച്ച ചിരിയും നര വീണ മുടിയും താടിയുമായി മമ്മൂട്ടിയെ ഈ പോസ്റ്ററിലൂടെ അവതരിപ്പിച്ചപ്പോൾ മലയാള സിനിമാ പ്രേക്ഷകരോടൊപ്പം മലയാള സിനിമാ ലോകവും ഞെട്ടുകയാണ്. കാതിൽ കടുക്കനും കഴുത്തിൽ മാലയും ഇട്ട് നഗ്നമായ മേൽ ശരീരവുമായി മമ്മൂട്ടി കഥാപാത്രം ചിരിക്കുമ്പോൾ ആ കണ്ണുകളിലും കാണാൻ സാധിക്കുന്നത് ക്രൂരതയുടെ കുടില ഭാവമാണ്. ഭൂതകാലത്തിലൂടെ കയ്യടി നേടിയ രാഹുൽ സദാശിവൻ രചിച്ചു സംവിധാനം ചെയ്യുന്ന ഈ ചിത്രത്തിന് സംഭാഷണങ്ങൾ ഒരുക്കുന്നത് ടി ഡി രാമകൃഷ്ണനാണ്. അർജുൻ അശോകൻ, സിദ്ധാർഥ് ഭരതൻ, അമൽദ ലിസ എന്നിവരും വേഷമിടുന്ന ഈ ബിഗ് ബഡ്ജറ്റ് പാൻ ഇന്ത്യൻ ചിത്രം ചക്രവർത്തി രാമചന്ദ്ര, എസ്. ശശികാന്ത് എന്നിവർ ചേർന്ന് നൈറ്റ് ഷിഫ്റ്റ് സ്റ്റുഡിയോസ്, വൈ നോട്ട് സ്റ്റുഡിയോസ് എന്നിവയുടെ ബാനറിലാണ് നിർമ്മിക്കുന്നത്.

മലയാളം കൂടാതെ തമിഴ്, ഹിന്ദി, തെലുങ്ക്, കന്നഡ ഭാഷകളിലും റിലീസ് ചെയ്യാൻ പോകുന്ന ഈ ചിത്രത്തിന് കാമറ ചലിപ്പിക്കുന്നത് ഷെഹനാദ് ജലാൽ, സംഗീതമൊരുക്കുന്നത് ക്രിസ്റ്റോ സേവ്യർ, എഡിറ്റ് ചെയ്യുന്നത് ഷഫീക്ക് മുഹമ്മദ് അലി എന്നിവരാണ്. ഒരു വലിയ ഇടവേളക്ക് ശേഷം നെഗറ്റീവ് സ്വഭാവമുള്ള കഥാപാത്രമായി പകർന്നാടി വെള്ളിത്തിരയിൽ വിസ്മയം തീർക്കാനുള്ള ഒരുക്കത്തിലാണ് മമ്മൂട്ടിയെന്ന മഹാനടൻ.

The post പേടിപ്പെടുത്തുന്ന ചിരിയും ക്രൗര്യമൊളിപ്പിച്ച കണ്ണുകളും; ഭീതിപ്പെടുത്തുന്ന ദുർമന്ത്രവാദത്തിന്റെ ആൾരൂപമായി മഹാനടന്റെ പരകായ പ്രവേശം. first appeared on Onlookersmedia.

The post പേടിപ്പെടുത്തുന്ന ചിരിയും ക്രൗര്യമൊളിപ്പിച്ച കണ്ണുകളും; ഭീതിപ്പെടുത്തുന്ന ദുർമന്ത്രവാദത്തിന്റെ ആൾരൂപമായി മഹാനടന്റെ പരകായ പ്രവേശം. appeared first on Onlookersmedia.