തമിഴിലെ യുവ സൂപ്പർ താരങ്ങളിൽ ഒരാളായ ശിവകാര്‍ത്തികേൻ നായകനായി എത്തുന്ന മാവീരന്‍ റിലീസിന് ഒരുങ്ങുകയാണ്. പ്രശസ്ത യുവ സംവിധായകൻ മഡോണി അശ്വിന്‍ തിരക്കഥയെഴുതി സംവിധാനം ചെയ്യുന്ന ഈ ചിത്രം ഏറെ ആവേശത്തോടെയാണ് ആരാധകരും സിനിമാ പ്രേമികളും കാത്തിരിക്കുന്നത്. കാര്‍ത്തിയുടെ നായികയായി വിരുമന്‍ എന്ന ചിത്രത്തിലൂടെ തമിഴ് സിനിമയില്‍ അരങ്ങേറ്റം കുറിച്ച അദിതി ശങ്കര്‍ ആണ് ഈ ചിത്രത്തിൽ ശിവകാർത്തികേയന്റെ നായികാ വേഷം ചെയ്യുന്നത്. പ്രശസ്ത സംവിധായകൻ ശങ്കറിന്റെ മകളാണ് അദിതി ശങ്കർ. ഒരു മാസ്സ് ചിത്രമായാണ് ഈ സിനിമ ഒരുക്കിയിരിക്കുന്നത്. വിധു അയ്യണ്ണ ഛായാഗ്രഹണവും ഭരത് ശങ്കര്‍ സംഗീതവും ഒരുക്കുന്ന ഈ ചിത്രം എഡിറ്റ് ചെയ്യുന്നത് ഫിലോമിൻ രാജ് ആണ്. ഇപ്പോഴിതാ ഇതിലെ ആദ്യ ഗാനം റിലീസ് ചെയ്തിരിക്കുകയാണ്.
ഇന്നലെ ഈ ഗാനത്തിന്റെ പ്രൊമോ വീഡിയോ പുറത്ത് വന്നിരുന്നു.കബിലൻ, സി ആർ ലോകേഷ് എന്നിവർ വരികൾ രചിച്ച സീനാ സീനാ എന്ന ഈ ഗാനം, ആലപിച്ചിരിക്കുന്നത് അനിരുദ്ധ് രവിചന്ദർ ആണ്. ആരാധകരെ ആവേശം കൊള്ളിക്കുന്ന ഒരു തട്ടു പൊളിപ്പൻ ഗാനമായാണ് സീനാ സീനാ ഒരുക്കിയിരിക്കുന്നത്. ഈ ഗാനത്തിന്റെ ലിറിക്കൽ വീഡിയോയാണ് ഇപ്പോൾ പുറത്തു വന്നിരിക്കുന്നത്. യോഗി ബാബു, സുനിൽ, കൗശിക് മഹത, മിഷ്കിൻ, സരിത, ഗൗണ്ടമണി, എന്നിവരും വേഷമിടുന്ന ഈ ചിത്രം നിർമ്മിക്കുന്നത് ശാന്തി ടാക്കീസിന്റെ ബാനറിൽ അരുൺ വിശ്വ ആണ്. ഡോൺ എന്ന സൂപ്പർ മെഗാ ഹിറ്റിലൂടെ കഴിഞ്ഞ വർഷം കയ്യടി നേടിയ ശിവകാർത്തികേയന്റെ പ്രിൻസ് എന്ന തമിഴ്-തെലുങ്ക് ദ്വിഭാഷാ ചിത്രം പരാജയപ്പെട്ടിരുന്നു. അത്കൊണ്ട് തന്നെ ഏറെ ആകാംഷയോടെയാണ് അദ്ദേഹത്തിന്റെ ആരാധകർ മാവീരൻ കാത്തിരിക്കുന്നത്.
