യുവ സൂപ്പർ താരം പൃഥ്വിരാജ് സുകുമാരനെ നായകനാക്കി ഷാജി കൈലാസ് ഒരുക്കിയ ബിഗ് ബഡ്ജറ്റ് മാസ്സ് ആക്ഷൻ ത്രില്ലറായ കടുവ ഈ വരുന്ന ജൂൺ മുപ്പതിന് റിലീസ് ചെയ്യാൻ പോവുകയാണ്. ഇതിനോടകം പുറത്തു വന്ന ഇതിന്റെ രണ്ടു ടീസറുകളും സോഷ്യൽ മീഡിയയിൽ വൈറലാണ്. പൃഥ്വിരാജ് അവതരിപ്പിക്കുന്ന കടുവാക്കുന്നേൽ കുറുവച്ചൻ എന്ന കഥാപാത്രത്തിന്റെ കിടിലൻ ഡയലോഗും ത്രസിപ്പിക്കുന്ന സംഘട്ടനവുമാണ് ഈ ടീസറുകളിൽ നമ്മൾ കണ്ടത്. അതുപോലെ തന്നെ ജേക്സ് ബിജോയൊരുക്കിയ പശ്‌ചാത്തല സംഗീതവും ആരാധകർക്ക് ആവേശം നൽകി. ഇപ്പോഴിതാ ഈ ചിത്രത്തിലെ ഏറ്റവും പുതിയ ലിറിക്കൽ വീഡിയോ സോങ് റിലീസാവുകയും സൂപ്പർ ഹിറ്റായിരിക്കുകയും ചെയ്തിരിക്കുകയാണ്. പാൽവർണ്ണ കുതിരമേൽ എന്ന വരികളോടെ തുടങ്ങുന്ന ഈ ഗാനം രചിച്ചിരിക്കുന്നത് സന്തോഷ് വർമയാണ്. ജേക്സ് ബിജോയ് ഈണം പകർന്ന ഈ ഗാനമാലപിച്ചിരിക്കുന്നതു ലിബിൻ സ്കറിയ, മിഥുൻ സുരേഷ്, ശ്വേതാ അശോക് എന്നിവർ ചേർന്നാണ്.
പൃഥ്വിരാജ് സുകുമാരന്റെ കിടിലൻ മാസ്സ് സ്റ്റില്ലുകളാണ് ഈ ഗാനത്തിന്റെ ലിറിക് വീഡിയോ വഴി പുറത്തു വന്നിരിക്കുന്നത്. പൃഥ്വിരാജ് പ്രൊഡക്ഷൻസ്, മാജിക് ഫ്രെയിംസ് എന്നിവയുടെ ബാനറിൽ സുപ്രിയ മേനോൻ, ലിസ്റ്റിൻ സ്റ്റീഫൻ എന്നിവർ ചേർന്നാണ് കടുവ നിർമ്മിച്ചിരിക്കുന്നത്. ബോളിവുഡ് താരം വിവേക് ഒബ്‌റോയ് വില്ലൻ വേഷം ചെയ്യുന്ന ഈ ചിത്രത്തിലെ നായികാ വേഷം ചെയ്യുന്നത് സംയുക്ത മേനോനാണ്. ഇവരെ കൂടാതെ സിദ്ദിഖ്, വിജയ രാഘവൻ, കലാഭവൻ ഷാജോൺ, ദിലീഷ് പോത്തൻ, അജു വർഗീസ്, സുദേവ് നായർ, സായി കുമാർ, സീമ, അർജുൻ അശോകൻ, ജനാർദ്ദനൻ, രാഹുൽ മാധവ്, റീന മാത്യൂസ്, പ്രിയങ്ക നായർ, മീനാക്ഷി, വൃദ്ധി വിശാൽ, ജൈസ് ജോസ്, കൊച്ചു പ്രേമൻ, സച്ചിൻ കടേക്കർ എന്നിവരും ഇതിന്റെ താരനിരയുടെ ഭാഗമാണ്. സുജിത് വാസുദേവ്, അഭിനന്ദം രാമാനുജൻ എന്നിവർ ചേർന്ന് കാമറ ചലിപ്പിച്ച ഈ ചിത്രം എഡിറ്റ് ചെയ്തത് ഷമീർ മുഹമ്മദാണ്.
