ലേഡി സൂപ്പർ സ്റ്റാർ നയൻ താര തന്റെ കരിയറിൽ ആദ്യമായി ഇരട്ട വേഷത്തിൽ അഭിനയിക്കുന്ന ചിത്രമാണ് ഐറ. പ്രേക്ഷകർ ഏറെ കാത്തിരിക്കുന്ന തമിഴ് ചിത്രങ്ങളിൽ ഒന്ന് കൂടിയാണ് ഐറ ഇപ്പോൾ. ഈ ചിത്രത്തിലെ മേഘദൂതം എന്ന ഗാനത്തിന്റെ ലിറിക് വീഡിയോ കഴിഞ്ഞ ദിവസം റിലീസ് ചെയ്തു. മനോഹരമായ ഈ ഗാനത്തിന് ഈണം പകർന്നിരിക്കുന്നത് കെ എസ് സുന്ദര മൂർത്തി ആണ്. വളരെ വ്യത്യസ്തവും ഞെട്ടിക്കുന്നതുമായ ഗെറ്റപ്പിലാണ് ഈ ചിത്രത്തിൽ നയൻ താര പ്രത്യക്ഷപ്പെടുന്നത് എന്നത് തന്നെയാണ് ഈ ചിത്രത്തിന്റെ ഹൈലൈറ്റുകളിൽ ഒന്ന്. വമ്പൻ പ്രതീക്ഷയോടെയാണ് നയൻ താര ആരാധകരും സിനിമാ പ്രേമികളും ഈ ചിത്രത്തിന്റെ റിലീസ് കാത്തിരിക്കുന്നത്.
ഒരു ഹൊറർ ചിത്രമായി ഒരുക്കിയിരിക്കുന്ന ഐറ എഴുതി സംവിധാനം ചെയ്തത് സര്‍ജുന്‍ കെ.എം ആണ്. ലക്ഷ്മി, മാ തുടങ്ങിയ ഷോര്‍ട്ട് ഫിലിമുകളിലൂടെ ശ്രദ്ധേയനായ ഈ സംവിധായകൻ എച്ചിരിക്കൈ’ എന്ന ത്രില്ലര്‍ സംവിധാനം ചെയ്‌തും പ്രേക്ഷക ശ്രദ്ധ പിടിച്ചു പറ്റിയിട്ടുണ്ട്. നയന്‍താരയ്ക്ക് പുറമെ കലൈയരശന്‍, യോഗി ബാബു എന്നിവരും ചിത്രത്തില്‍ നിർണ്ണായക വേഷങ്ങൾ ചെയ്യുന്നുണ്ട്. മലയാളി താരം കുളപ്പുള്ളി ലീലയും ഈ ചിത്രത്തിൽ ഒരു വേഷം ചെയ്യുന്നുണ്ട്. കെ ജെ ആർ സ്റ്റഡീസിന്റെ ബാനറിൽ കോട്ടപ്പടി ജെ രാജേഷ് നിർമ്മിച്ച ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് സുദർശൻ ശ്രീനിവാസനും ഈ ചിത്രം എഡിറ്റ് ചെയ്തത് കാർത്തിക് ജോഗേഷും ആണ്. ഐറ രാജഗോപാൽ, കാവ്യാ എന്നീ പേരുള്ള കഥാപാത്രങ്ങളെയാണ് നയൻ താര ഈ ചിത്രത്തി അവതരിപ്പിക്കുന്നത്.
