യുവ താരം ടോവിനോ തോമസ് നായകനായ പുതിയ ചിത്രമാണ് എന്റെ ഉമ്മാന്റെ പേര്. നവാഗതനായ ജോസ് സെബാസ്റ്റിയൻ രചനയും സംവിധാനവും നിർവഹിച്ച ഈ ചിത്രത്തിന്റെ ആദ്യ ടീസർ ഇന്ന് റിലീസ് ചെയ്തു. മികച്ച പ്രേക്ഷക പ്രതികരണം ആണ് ഈ ടീസർ ഇപ്പോൾ നേടിയെടുക്കുന്നത്. ആന്റോ ജോസഫ് ഫിലിം കമ്പനി, അൽ ടാരി മൂവീസ് എന്നിവയുടെ ബാനറിൽ ആന്റോ ജോസെഫ്, സി ആർ സലിം എന്നിവർ ചേർന്ന് നിർമ്മിച്ച ഈ ഫാമിലി ഡ്രാമ ക്രിസ്മസ് റിലീസ് ആയി തീയേറ്ററുകളിൽ എത്തും. സംവിധായകനും ശരത് ആർ നാഥും ചേർന്നാണ് ഈ ചിത്രത്തിന്റെ തിരക്കഥയും സംഭാഷണങ്ങളും രചിച്ചിരിക്കുന്നത്.
ജോർഡി പ്ലാനെൽ ക്ലോസ ഛായാഗ്രഹണം നിർവഹിച്ചിരിക്കുന്ന a ഈ ചിത്രത്തിന് സംഗീതം ഒരുക്കിയിരിക്കുന്നത് ഗോപി സുന്ദർ ആണ്. അർജു ബെൻ ആണ് ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നത്. ടോവിനോ തോമസിനൊപ്പം പ്രശസ്ത നടി ഉർവശി, സായി പ്രിയ ദേവ, സിദ്ദിഖ്, മാമുക്കോയ, ഹാരിഷ് കണാരൻ, ദിലീഷ് പോത്തൻ, ശാന്തി കൃഷ്ണ എന്നിവരും ഈ ചിത്രത്തിന്റെ താര നിരയിൽ ഉണ്ട്. തീവണ്ടി, ഒരു കുപ്രസിദ്ധ പയ്യൻ എന്നീ ചിത്രങ്ങളുടെ വിജയത്തിന് ശേഷം എത്തുന്ന ടോവിനോ ചിത്രമാണ് എന്റെ ഉമ്മാന്റെ പേര്. ടൈറ്റിൽ സൂചിപ്പിക്കുന്നത് പോലെ തന്നെ ഒരമ്മയും മകനും തമ്മിലുള്ള ബന്ധം തന്നെയാണ് ഈ ചിത്രത്തിന്റെ കഥാ തന്തു. ധനുഷ് നായകനായ മാരി 2 എന്ന ചിത്രവും ടോവിനോയുടെതായി ക്രിസ്മസിന് എത്തുന്നുണ്ട്. അതിൽ വില്ലൻ ആയാണ് ടോവിനോ അഭിനയിച്ചിരിക്കുന്നത്. ഉയരെ, കൽക്കി എന്നീ ചിത്രങ്ങളും ടോവിനോയുടെതായി അടുത്ത വർഷം ആദ്യം എത്തും.
