സ്വാതന്ത്ര്യം അർദ്ധരാത്രിയിൽ എന്ന ചിത്രത്തിന്റെ ട്രൈലെർ ആണ് ഇപ്പോൾ സോഷ്യൽ മീഡിയയുടെ ചർച്ചാ വിഷയം എന്ന് പറയാം നമ്മുക്ക്. കാരണം ഇന്നലെ റിലീസ് ചെയ്ത ഈ ചിത്രത്തിന്റെ ട്രൈലെർ ഇപ്പോൾ ബോളിവുഡിൽ വരെ സംസാര വിഷയം ആയി കഴിഞ്ഞു എന്നാണ് പ്രതികരണങ്ങൾ സൂചിപ്പിക്കുന്നത്.
ബോളിവുഡ് താരങ്ങൾ വരെ ഈ ചിത്രത്തിന്റെ ട്രൈലറിനെ പ്രകീർത്തിച്ചു രംഗത്ത് വന്നു കഴിഞ്ഞു. ബോളിവുഡ് താരങ്ങളായ സുനിൽ ഷെട്ടി, ജാക്കി ഷെറോഫ് എന്നിവരാണ് ഈ ട്രൈലെർ കണ്ടിഷ്ടമായി തങ്ങളുടെ ട്വിറ്റെർ അക്കൗണ്ടുകളിലൂടെ ട്രൈലെർ ഷെയർ ചെയ്തു കൊണ്ട് മുന്നോട്ടു വന്നിരിക്കുന്നത്. സിനിമ ആസ്വദിക്കാൻ ഭാഷ ഒരിക്കലും ഒരു തടസമല്ല എന്നും , ഈ ചിത്രത്തിന്റെ ട്രൈലെർ തന്റെ ശ്രദ്ധയാർഷിച്ചു എന്നും പറഞ്ഞാണ് സുനിൽ ഷെട്ടി ഈ ട്രൈലെർ ഷെയർ ചെയ്തിരിക്കുന്നത്. ചിത്രത്തിലെ നായകനായ ആന്റണി വർഗീസിന് ആശംസകളും നേർന്നിട്ടുണ്ട് സുനിൽ ഷെട്ടി.
ട്രൈലെർ ഗംഭീരമായിട്ടുണ്ട് എന്ന് പറഞ്ഞു കൊണ്ടാണ് ജാക്കി ഷെറോഫ് ഈ ട്രൈലെർ ഷെയർ ചെയ്തിരിക്കുന്നത്. മലയാള സിനിമാ പ്രേമികളും വമ്പൻ വരവേൽപ്പാണ് ഈ ട്രെയിലറിന് നൽകിയത്. ഇപ്പോൾ സോഷ്യൽ മീഡിയയിൽ തരംഗമായി മാറിയിരിക്കുന്ന ഈ ട്രൈലെർ പ്രേക്ഷകരെ ത്രസിപ്പിക്കുക മാത്രമല്ല ചെയ്യുന്നത്, ഒപ്പം ഈ ചിത്രത്തിന്റെ ഹൈപ്പ് വളരെയധികം വർധിപ്പിക്കുക കൂടിയാണ്.
നവാഗതനായ ടിനു പാപ്പച്ചൻ സംവിധാനം ചെയ്ത ഈ ചിത്രം രചിച്ചിരിക്കുന്നത് ദിലീപ് കുര്യനും നിർമ്മിച്ചിരിക്കുന്നത് സൂര്യ സിനിമയുടെ ബാനറിൽ ബി സി ജോഷിയും ആർ ഡി ഇല്ല്യൂമിനേഷന്റെ ബാനറിൽ ബി ഉണ്ണിക്കൃഷ്ണനുമാണ്. ലിജോ ജോസ് പെല്ലിശ്ശേരി, ചെമ്പൻ വിനോദ് ജോസ് എന്നിവരും ഈ ചിത്രത്തിന്റെ സഹ നിർമ്മാതാക്കൾ ആണ്. വിനായകൻ, ചെമ്പൻ വിനോദ്, ലിജോ ജോസ് പെല്ലിശ്ശേരി എന്നിവരാണ് ഈ ചിത്രത്തിലെ മറ്റു പ്രമുഖ താരങ്ങൾ.
