മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരനിപ്പോൾ തന്റെ ഏറ്റവും പുതിയ ചിത്രമായ കടുവയുടെ പ്രമോഷന്റെ തിരക്കിലാണ്. പാൻ ഇന്ത്യൻ ചിത്രമായി മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ ഒരേ സമയം റിലീസ് ചെയ്യാൻ പോകുന്ന ഈ ചിത്രം സൂപ്പർ ഹിറ്റ് സംവിധായകൻ ഷാജി കൈലാസാണ് സംവിധാനം ചെയ്തിരിക്കുന്നത്. ഇപ്പോഴിതാ ഈ ചിത്രത്തിന്റെ തമിഴ് പതിപ്പിന്റെ പ്രമോഷന്റെ ഭാഗമായി ഗലാട്ട തമിഴിന് നൽകിയ അഭിമുഖത്തിൽ ദളപതി വിജയ്‌യെ കുറിച്ച് പൃഥ്വിരാജ് പറഞ്ഞ വാക്കുകളാണ് ശ്രദ്ധ നേടുന്നത്. വിജയ്‌യുടെ മാസ്സ് ചിത്രങ്ങളെ കുറിച്ചും അദ്ദേഹത്തിന് കേരളത്തിലുള്ള ജനപ്രീതിയെ കുറിച്ചുമാണ് പൃഥ്വിരാജ് സുകുമാരൻ സംസാരിക്കുന്നത്, ഇന്ന് കേരളത്തിലെ ഒരു സൂപ്പർ സ്റ്റാർ ചിത്രം റിലീസ് ചെയ്യുമ്പോൾ കിട്ടുന്ന അതേ വരവേൽപ്പാണ് ഒരു വിജയ് ചിത്രം ഇവിടെ റിലീസ് ചെയ്യുമ്പോൾ കിട്ടുന്നതെന്നാണ് പൃഥ്വിരാജ് പറയുന്നത്.
വിജയ് ചിത്രത്തിലേക്ക് പ്രേക്ഷകരെ ആകർഷിക്കുന്ന എന്തോ ഒന്നുണ്ടെന്നും, അത് കൃത്യമായി കൊടുക്കാൻ വിജയ്ക്ക് സാധിക്കുന്നത് കൊണ്ടാണ് തുടർച്ചയായി വലിയ വിജയങ്ങളുണ്ടാക്കാനും, വലിയ മാർക്കറ്റ് സൃഷ്ടിക്കാനും അദ്ദേഹത്തിന് സാധിക്കുന്നതെന്നു പൃഥ്വിരാജ് വിശദീകരിക്കുന്നു. വിജയ് തിരക്കഥ തിരഞ്ഞെടുക്കുന്നത് എങ്ങനെയാണെന്ന് തനിക്കറിയാൻ ആഗ്രഹമുണ്ടെന്ന് പണ്ടൊരിക്കൽ പൃഥ്വിരാജ് പറഞ്ഞിട്ടുണ്ട്. എങ്ങനെയാണു ഒരു ചിത്രം പ്രേക്ഷകർക്ക് ഇഷ്ടപെടുമെന്നു തിരിച്ചറിഞ്ഞു അത് തിരഞ്ഞെടുക്കുന്നതെന്നതാണ് പൃഥ്വിരാജ് ചോദിക്കുന്നത്. ഏതായാലും ദളപതി വിജയ്‌യെ കുറിച്ച് പൃഥ്വിരാജ് പറഞ്ഞ വാക്കുകൾ ഏറെ ആവേശത്തോടെയാണ് വിജയ് ആരാധകർ സ്വീകരിക്കുന്നത്. ഈ അടുത്തിടെ റിലീസ് ചെയ്ത കമൽ ഹാസൻ ചിത്രം വിക്രം കേരളത്തിലെ ഏറ്റവും വലിയ തമിഴ് ഗ്രോസ്സർ ആവുന്നതിനു മുൻപ് വരെ വിജയ് ചിത്രങ്ങളായിരുന്നു തമിഴിൽ നിന്ന് വന്നു ഇവിടെ ഏറ്റവും കൂടുതൽ കളക്ഷൻ നേടിയിരുന്നത്.
