പൃഥ്വിരാജിന്റെ ആദ്യ സംവിധാന സംരഭമായ ലൂസിഫർ നിറഞ്ഞ സദസ്സിൽ പ്രദർശനം തുടർന്നുകൊണ്ടിരിക്കുകയാണ്. മോഹൻലാലിനെ നായകനാക്കി ഒരുക്കിയിരിക്കുന്ന ചിത്രം സകല ബോക്സ് ഓഫീസ് റെക്കോർഡുകൾ തകർത്ത് മുന്നേറികൊണ്ടിരിക്കുകയാണ്. ടൈംസ് ഓഫ് ഇന്ത്യയ്ക്ക് നൽകിയ അഭിമുഖത്തിൽ സംവിധായകൻ ലിജോ ജോസ് പെല്ലിശ്ശേരിയെ പ്രശംസിച്ചു പൃഥ്വിരാജ് രംഗത്തെത്തിയിരിക്കുകയാണ്. ഒരു സംവിധായകന്റെ കഴിവ് അളക്കേണ്ടത് ചെറുതോ വലുതോ ചിത്രം ചെയ്തത് കൊണ്ട് മാത്രമല്ലയെന്നും ‘ഈ.മ.യൗ’ പോലത്തെ ചിത്രങ്ങളിൽ സംവിധായകന്റെ ഒരു വേറിട്ട കഴിവ് കാണാൻ സാധിക്കും എന്ന് പൃഥ്വിരാജ് അഭിപ്രായപ്പെട്ടു.
സിറ്റി ഓഫ് ഗോഡ്, ഡബിൾ ബാരൽ എന്നീ ചിത്രങ്ങളിൽ പൃഥ്വിരാജ്- ലിജോ ജോസ് പെല്ലിശ്ശേരി ഒരുമിച്ചു പ്രവർത്തിച്ചിട്ടുണ്ട്. ഈ.മ.യൗ പോലത്തെ സിനിമകൾ സംവിധായകന്റെ സിനിമയാണെന്നും അത്തരം ചിത്രങ്ങൾ സംവിധാനം ചെയ്യാൻ ഒരു പ്രത്യേക കഴിവ് വേണമെന്നും ലിജോ ജോസ് പകരം വെക്കാൻ സാധിക്കാത്ത സംവിധായകനാണെന്നും സൂചിപ്പിക്കുകയുണ്ടായി. വെറും 18 ദിവസം കൊണ്ടാണ് ഈ.മ.യൗ എന്ന സിനിമയുടെ ചിത്രീകരണം ലിജോ ജോസ് പല്ലിശേരി പൂർത്തിയാക്കിയത്. മികച്ച സംവിധായകനുള്ള സംസ്ഥാന സർക്കാരിന്റെ പുരസ്‌കാരവും ലിജോ ജോസ് പല്ലിശേരിയെ തേടിയെത്തുകയുണ്ടായി.
