ജനപ്രിയ നായകൻ ദിലീപ് നായകനായി എത്തുന്ന ജാക്ക് ഡാനിയൽ എന്ന പുതിയ ചിത്രം റിലീസിന് എത്തുകയാണ്. എസ് എൽ പുരം ജയസൂര്യ സംവിധാനം ചെയ്ത ഈ ചിത്രത്തിൽ തമിഴിന്റെ ആക്ഷൻ കിംഗ് അർജുനും അഭിനയിക്കുന്നുണ്ട്. ഈ ചിത്രത്തിന്റെ പ്രമോഷന്റെ ഭാഗമായി കഴിഞ്ഞ ദിവസങ്ങളിൽ നടന്ന അഭിമുഖങ്ങളിൽ ഒന്നിൽ ദിലീപ് മോഹൻലാൽ എന്ന നടനുമായുള്ള തന്റെ ബന്ധം വെളിപ്പെടുത്തുന്നു. ലാലേട്ടനെ തനിക്കു ഒരിക്കലും മറക്കാൻ പറ്റില്ല എന്നും ലാലേട്ടനെ മറക്കണം എങ്കിൽ താൻ തന്റെ സിനിമയെ തന്നെ മറന്നു പോകണം എന്നുമാണ് ദിലീപ് പറയുന്നത്. അതിനു കാരണവും ദിലീപ് പറയുന്നുണ്ട്.
താൻ ആദ്യമായി കമൽ സാറിന്റെ കൂടെ അസിസ്റ്റന്റ് ഡയറക്ടർ ആയി ചേരുന്നത് ലാലേട്ടൻ നായകനായ വിഷ്ണു ലോകം എന്ന സിനിമയിലൂടെ ആണെന്നും, അന്ന് ആ സെറ്റിൽ വെച്ച് ലാലേട്ടന്റെ മുന്നിലാണ് താൻ ആദ്യമായി ക്ലാപ് അടിച്ചു തന്റെ സിനിമാ ജീവിതം ആരംഭിക്കുന്നതെന്നും ദിലീപ് പറഞ്ഞു. താൻ ലാലേട്ടനെ അനുകരിച്ചിരുന്നത് കൊണ്ട് സെറ്റിലൊക്കെ തമാശയും കാര്യങ്ങളുമൊക്കെ ആയാണ് മുന്നോട്ടു പോയിരുന്നതെന്നും, വളരെ സ്നേഹത്തോടെയാണ് ലാലേട്ടൻ തന്നോട് പെരുമാറിയിട്ടുള്ളത് എന്നും ദിലീപ് പറയുന്നു. ഉള്ളടക്കം എന്ന കമൽ സിനിമയുടെ സെറ്റിൽ വെച്ചാണ് താനും ലാലേട്ടനും കൂടുതൽ അടുക്കുന്നത് ദിലീപ് പറയുന്നു
അതിനു ശേഷം ദിലീപ് നടനായി വരികയും വർണ പകിട്ട്, ട്വന്റി ട്വറ്റി, ക്രിസ്ത്യൻ ബ്രദേഴ്‌സ്, ചൈന ടൌൺ എന്നീ ചിത്രങ്ങളിൽ മോഹൻലാലിനൊപ്പം അഭിനയിക്കുകയും ചെയ്തു. ഇതിൽ ട്വന്റി ട്വന്റി ദിലീപ് നിർമ്മിച്ചത് ആണെങ്കിൽ ചൈന ടൌൺ മോഹൻലാൽ നിർമ്മിച്ച ചിത്രമാണ്. മേൽ പറഞ്ഞ ചിത്രങ്ങളിൽ രണ്ടു ചിത്രങ്ങളിൽ ദിലീപ് മോഹൻലാലിന്റെ അനുജൻ ആയാണ് അഭിനയിച്ചത്. ഇവർ ഒന്നിച്ചു അഭിനയിച്ച എല്ലാ ചിത്രങ്ങളും വലിയ ബോക്സ് ഓഫിസ് വിജയവും നേടിയിട്ടുണ്ട് എന്നതാണ് ശ്രദ്ധേയമായ കാര്യം. ഇനിയും ഈ കൂട്ടുകെട്ടിൽ ഒരു ചിത്രം വരാനുള്ള കാത്തിരിപ്പിൽ ആണ് രണ്ടു പേരുടെയും ആരാധകർ
