എം ടി വാസുദേവൻ നായരുടെ രചനയിൽ ഫഹദ് ഫാസിലിനെ നായകനാക്കി മഹേഷ് നാരായണൻ ഒരുക്കുന്ന ചിത്രം വരികയാണ്. ഷെർലക് എന്നാണ് ഈ ചിത്രത്തിന് നൽകിയിരിക്കുന്ന പേര്. ചിത്രത്തിന്റെ ഷൂട്ടിംഗ് ജനുവരിയില്‍ കാനഡയില്‍ തുടങ്ങും എന്നാണ് കാൻ ചാനൽ മീഡിയ റിപ്പോർട്ട് ചെയ്യുന്നത്. ഈ ചിത്രത്തിൽ ഫഹദിന്റെ സഹോദരിയായി നാദിയാ മൊയ്തു ആണ് എത്തുന്നത്. എം.ടി. വാസുദേവന്‍നായരുടെ പ്രശസ്തമായ ചെറുകഥകളിലൊന്നായ ഷെര്‍ലക്ക് ആണ് ഈ ചിത്രത്തിന് ആധാരം. ഈ കഥയിൽ ഷെര്‍ലക്ക് ഒരു പൂച്ചയുടെ പേരാണ്. അമേരിക്കയിലുള്ള ചേച്ചിയുടെ വീട്ടിലെത്തുന്ന ബാലു എന്ന കഥാപാത്രമായി ഫഹദ് അഭിനയിക്കുമ്പോൾ ചേച്ചി ആയാണ് നാദിയ അഭിനയിക്കുന്നത്. ചേച്ചിയുടെ വീട്ടിലെ വളര്‍ത്തു പൂച്ച ആണ് ഷെർലോക്. ഫഹദ് ഫാസിലും നാദിയയും ഇതാദ്യമായിട്ടാണ് ഒരു സിനിമയില്‍ ഒന്നിക്കുന്നത്. ഈ പടത്തിന്റെ ഷൂട്ടിംഗിനായി അടുത്ത മാസം ആദ്യം കാനഡയിലേയ്ക്ക് പുറപ്പെടാനിരിക്കുകയാണ് മഹേഷും സംഘവും എന്നാണ് സൂചന.
എം.ടിയുടെ പത്ത് ചെറുകഥകളെ അധീകരിച്ച് ഒരുങ്ങുന്ന പത്തു ചലച്ചിത്രങ്ങളില്‍ ഒന്നുകൂടിയാണ് ഷെര്‍ലക്ക്. നെറ്റ്ഫ്‌ളിക്‌സിനാണ് ഈ ചിത്രങ്ങളുടെ നിര്‍മ്മാണാവകാശം. ഫഹദ് ചിത്രം കൂടാതെ ബാക്കി ഒൻപതു ചിത്രങ്ങളിൽ അഭിനയിക്കുന്നത് മോഹൻലാൽ, മമ്മൂട്ടി, പൃഥ്വിരാജ്, ബിജു മേനോൻ, സിദ്ദിഖ്, നെടുമുടി വേണു, പാർവതി, ആസിഫ് അലി, ഇന്ദ്രജിത് തുടങ്ങിയ താരങ്ങൾ ആണ്. പ്രിയദർശൻ ആണ് ഇതിൽ കൂടുതൽ ചിത്രങ്ങൾ ചെയ്യുന്നത്. ബിജു മേനോൻ നായകനായ ശിലാലിഖിതങ്ങൾ, മോഹൻലാൽ നായകനായ ഓളവും തീരവും എന്നിവയാണ് അവ. മമ്മൂട്ടി ചിത്രം ഒരുക്കുന്നത് ലിജോ ജോസ് പെല്ലിശ്ശേരി ആണ്. സന്തോഷ് ശിവൻ, ജയരാജ്, ശ്യാമ പ്രസാദ് എന്നിവരും ഈ സീരീസിലെ ചിത്രങ്ങൾ ഒരുക്കുന്നുണ്ട്.
