ഇതിഹാസ നായിക ആയിരുന്ന സാവിത്രിയുടെ ജീവിത കഥ പറയുന്ന തെലുങ്ക് ചിത്രമാണ് മഹാനദി. നാഗ് അശ്വിൻ സംവിധാനം ചെയ്ത ഈ ചിത്രം അടുത്ത മാസം ലോകമെമ്പാടും പ്രദർശനത്തിന് എത്തും. തെലുങ്കു കൂടാതെ തമിഴ്, മലയാളം ഭാഷകളിൽ ഡബ്ബ് ചെയ്‌തും ഈ ചിത്രം പ്രദർശനത്തിന് എത്തുമെന്നാണ് റിപ്പോർട്ടുകൾ പറയുന്നത്. മലയാളിയും പ്രശസ്ത സൗത്ത് ഇന്ത്യൻ നടിയുമായ കീർത്തി സുരേഷ് സാവിത്രി ആയി വേഷമിട്ടിരിക്കുന്ന ഈ ചിത്രത്തിൽ മലയാളത്തിന്റെ യുവ താരം ദുൽകർ സൽമാൻ ജമിനി ഗണേശൻ ആയി അഭിനയിച്ചിട്ടുണ്ട്. ഇവരെ കൂടാതെ സാമന്ത, നാഗ ചൈതന്യ, വിജയ് ദേവർകൊണ്ട എന്നിവരും ഈ ചിത്രത്തിന്റെ താര നിരയുടെ ഭാഗമാണ്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഒക്കെ വളരെയധികം ശ്രദ്ധ നേടിയിരുന്നു.
Vineeth Josy
എന്നാൽ ഇപ്പോൾ സോഷ്യൽ മീഡിയയിൽ വൈറൽ ആയി മാറിയിരിക്കുന്നത് ഈ ചിത്രത്തിന്റെ ഒരു ഫാൻ മേഡ് പോസ്റ്റർ ആണ്. വിനീത് ജോസി എന്ന ഡിസൈനർ ആണ് ഈ ഫാൻ മേഡ് പോസ്റ്റർ ഉണ്ടാക്കിയിരിക്കുന്നത്. ദുൽകർ സൽമാനെയും കീർത്തി സുരേഷിനെയും വെച്ചു ഡിസൈൻ ചെയ്തിരിക്കുന്ന ഈ പോസ്റ്റർ ആരാധകരെയും സിനിമാ പ്രേമികളെയും ഒരുപോലെ ആകർഷിച്ചു കഴിഞ്ഞു.
പ്രകാശ് രാജ്, ശാലിനി പാണ്ഡെ എന്നിവരും ഈ ചിത്രത്തിന്റെ താര നിരയുടെ ഭാഗമാണ് എന്നാണ് സൂചന. ദുൽകർ സൽമാന്റെ ആദ്യ തെലുങ്ക് ചിത്രമാണ് മഹാനദി. അതുപോലെ ഈ ചിത്രത്തിലെ ഒരു പ്രധാന വേഷം ചെയ്തിരിക്കുന്ന സാമന്ത അവതരിപ്പിക്കുന്നത് ഒരു പത്രപ്രവർത്തകയുടെ വേഷമാണ് എന്നാണ് റിപ്പോർട്ടുകൾ പറയുന്നത്. ദുൽകർ സൽമാൻ ഇപ്പോൾ തമിഴ്, ഹിന്ദി പ്രൊജെക്ടുകളും ആയി ബിസി ആണ്. മലയാളത്തിൽ ദുല്കറന്റേതായി അടുത്തെങ്ങും റിലീസുകൾ ഇല്ല.
