പ്രശസ്ത സിനിമാ താരങ്ങളുടെ കുട്ടിക്കാല ചിത്രങ്ങൾ എന്നും പ്രേക്ഷകർക്ക് ഏറെ പ്രീയപെട്ടവയാണ്. പലപ്പോഴും താരങ്ങളുടെ കുട്ടിക്കാല ചിത്രങ്ങളും പഴയകാല അപൂർവ ചിത്രങ്ങളും സോഷ്യൽ മീഡിയയിൽ വൈറലാവാറുമുണ്ട്. അതിൽ തന്നെ പ്രശസ്ത നടിമാരുടെ കുട്ടിക്കാല ചിത്രങ്ങൾക്ക് വലിയ സ്വീകരണമാണ് ലഭിക്കാറുള്ളത്. ഇപ്പോഴിതാ ഒരു കാലത്തു മലയാള സിനിമയിൽ നിറഞ്ഞു നിന്നിരുന്ന, മലയാളികൾക്ക് ഏറെ പ്രീയപ്പെട്ട സംവൃത സുനിലിന്റെ കുട്ടിക്കാല ഫോട്ടോ ആണ് സോഷ്യൽ മീഡിയയുടെ ശ്രദ്ധ നേടുന്നത്. സംവൃത തന്നെയാണ് തന്റെ കുട്ടിക്കാല ചിത്രം ഇൻസ്റാഗ്രാമിലൂടെ പങ്കു വെച്ചത്. 2004 ൽ ലാൽ ജോസ് സംവിധാനം ചെയ്ത രസികൻ എന്ന ചിത്രത്തിലൂടെയായിരുന്നു സംവൃതയുടെ നായികയായി ഉള്ള അരങ്ങേറ്റം. അതിനു മുൻപ് ഏതാനും ചിത്രങ്ങളിൽ ബാലതാരമായി സംവൃത അഭിനയിച്ചിട്ടുമുണ്ട്. രഞ്ജിത്ത് സംവിധാനം ചെയ്ത നന്ദനത്തിൽ ബാലാമണി എന്ന കഥാപാത്രത്തെ അവതരിപ്പിക്കാൻ സംവിധായകൻ ആദ്യം സമീപിച്ചത് സംവൃതയെ ആയിരുന്നു എങ്കിലും ഒൻപതാം ക്ലാസ്സ് വിദ്യാർത്ഥിനിയായിരുന്ന സംവൃത അന്ന് ആ ക്ഷണം നിരസിച്ചതോടെ ആ വേഷം നവ്യ നായർക്ക് ലഭിച്ചു.
മലയാള സിനിമയിലെ ഉയരം കൂടിയ നായികമാരിൽ ഒരാൾ കൂടിയാണ് സംവൃത എന്നും പറയാം. ഏതായാലും ഇപ്പോൾ പുറത്തു വന്നിരിക്കുന്ന, സംവൃതയുടെ കുട്ടിക്കാല ചിത്രം വലിയ രീതിയിലാണ് ആരാധകർ ഏറ്റെടുക്കുന്നത്. പുഞ്ചിരിയോടെ നിൽക്കുന്ന കുഞ്ഞു സംവൃതയെ ആണ് ഈ ചിത്രത്തിൽ കാണാൻ സാധിക്കുന്നത്. ഇപ്പോൾ കുടുംബത്തോടൊപ്പം അമേരിക്കയിൽ ആണ് സംവൃത. മൂത്ത മകൻ അഗസ്ത്യയ്ക്ക് അനിയനായി മറ്റൊരു കുഞ്ഞ് കൂടി ജീവിതത്തിലേക്ക് എത്തിയ കാര്യവും അതുപോലെ ജീവിതത്തിലെ മറ്റു വിശേഷങ്ങളും സംവൃത സമൂഹ മാധ്യമങ്ങളിലൂടെ പ്രേക്ഷകരുമായി പങ്കു വെക്കാറുണ്ട്. രുദ്ര എന്നാണ് തന്റെ രണ്ടാമത്തെ കുഞ്ഞിന് നൽകിയ പേര് എന്നും സംവൃത അറിയിച്ചിരുന്നു.
