ഏകദേശം അറുന്നൂറോളം സിനിമാ സ്ക്രീനുകൾ ആണ് കേരളത്തിൽ ഉള്ളത്. മൾട്ടിപ്ളെക്സുകളുടെ കടന്നു വരവോടെയാണ് കേരളത്തിലെ സ്‌ക്രീനുകളുടെ എണ്ണം കൂടിയത്. അതുപോലെ പഴയ ഒരുപാട് സ്ക്രീനുകൾ ആധുനിക സാങ്കേതിക സൗകര്യങ്ങളോടെ പുനർനിർമ്മിക്കുകയും ചെയ്തിട്ടുണ്ട്. തൃശൂരിലെ ചേതന സ്ഥാപനങ്ങളുടെ രജത ജൂബിലി ആഘോഷങ്ങളുടെ ഭാഗമായി ശബ്ദ സംവിധാന രംഗത്തെ വിദഗ്ദ്ധരും സിനിമാ രംഗത്തെ സംഘടനാ നേതാക്കന്മാരുമായി തീയേറ്ററുകളിൽ ശബ്ദ സംവിധാനങ്ങൾ മെച്ചപ്പെടുത്തുന്നതിന് വേണ്ടിയുള്ള നടപടികൾ ചർച്ച ചെയ്യുകയും അതോടൊപ്പം കേരളത്തിലെ ഏറ്റവും മികച്ച ശബ്ദ ദൃശ്യ മികവുള്ള മൂന്നു തീയേറ്ററുകളെ തിരഞ്ഞെടുക്കുകയും ചെയ്തു.
തിരുവനന്തപുരത്തുള്ള ഏരീസ് പ്ലെക്സ്, തൃശൂരിലെ രാഗം തീയേറ്റർ, കോഴിക്കോട് മുക്കത്തുള്ള റോസ് തീയേറ്റർ എന്നിവയാണ് പുരസ്‍കാരങ്ങൾ നേടിയത്. തീയേറ്റർ ഉടമകളുടെയും സൗണ്ട് എഞ്ചിനീയർമാരുടെയും ഓഡിയോഗ്രാഫർമാരുടെയും സംഘടനാ നേതാക്കൾ തമ്മിൽ നടന്ന ചർച്ചയിൽ സിനിമയിലെ യഥാർത്ഥ ശബ്ദ സൗകുമാര്യം തീയേറ്ററുകളിൽ ലഭ്യമാക്കാനുള്ള തീരുമാനം എടുത്തു. തൃശൂർ റീജിയണൽ തീയേറ്ററിൽ വെച്ചായിരുന്നു ഈ ചർച്ച നടന്നത്. സംസ്ഥാന ചലച്ചിത്ര അവാർഡിൽ മികച്ച തീയേറ്ററുകൾക്കു ഉള്ള പുരസ്‍കാരവും നൽകണം എന്ന അഭിപ്രായവും ചർച്ചയിൽ ഉയർന്നു.
മിക്സ് റൂം ടു എക്സിബിഷൻ ഹാൾ എന്ന വിഷയത്തിൽ ആണ് സംവാദം നടന്നത്. ഇതിൽ ഫിലിം എക്സിബിറ്റേഴ്സ് അസോസിയേഷൻ ഭാരവാഹിക, സൗണ്ട് മിക്സിങ് എൻജിനീയർസ്, ഡോൾബി ഇന്ത്യ പ്രതിനിധി, സൈൻ ഓഡിയോഗ്രാഫേഴ്സ് അസോസിയേഷൻ ഓഫ് കേരളയുടെ പ്രതിനിധികൾ സൗണ്ട് കൺസൾറ്റൻറ്സ് തുടങ്ങി ഒട്ടേറെ പ്രമുഖർ പങ്കെടുത്തു. അവാർഡ് നേടിയ തൃശൂർ രാഗം തീയേറ്റർ ഉടമ സുനിൽ എ കെ മലയാളത്തിലെ പ്രമുഖ സിനിമാ നിർമ്മാതാവ് കൂടിയാണ്.
