ദളപതി വിജയ്, മാസ്റ്റർ ഡയറക്ടർ എ ആർ മുരുഗദോസും ആയി വീണ്ടും ഒന്നിക്കുകയാണ് ഒരു ചിത്രത്തിന് വേണ്ടി എന്ന് ഏവർക്കും അറിയാവുന്ന കാര്യം ആണ്. ഇവർ ഒന്നിക്കുന്ന പുതിയ ചിത്രത്തിന്റെ ഷൂട്ടിങ് അധികം വൈകാതെ ആരംഭിക്കാൻ പോവുകയാണ്. ഈ വർഷം ദീപാവലി റിലീസ് ആയി വിജയ്- എ ആർ മുരുഗദോസ് ചിത്രം തിയേറ്ററിൽ എത്തുമെന്നാണ് ഇപ്പോൾ വരുന്ന വാർത്തകൾ പറയുന്നത്.
എന്നാൽ ഇപ്പോൾ സോഷ്യൽ മീഡിയയിൽ ഈ ചിത്രത്തിന്റെ ഫോട്ടോഷൂട്ട് ചിത്രങ്ങൾ തരംഗം ആവുകയാണ്. ചിത്രത്തിന്റെ പോസ്റ്ററുകൾ തയ്യാറാക്കുന്നതിന് വേണ്ടിയുള്ള ഫോട്ടോഷൂട്ട് കഴിഞ്ഞ ദിവസം നടന്നു. അവിടെ നിന്ന് ആരോ മൊബൈലിൽ പകർത്തിയ വിഡിയോയും ചില ഫോട്ടോകളുമാണ് സോഷ്യൽ മീഡിയയിൽ കത്തി പടരുന്നത്. വിജയ്‌യുടെ സ്റ്റൈലിഷ് ലുക്ക് ആണ് ഈ തരംഗമാകുന്ന ഫോട്ടോകളിലും വിഡിയോയിലുമെല്ലാം കാണാൻ കഴിയുന്നത്.
എ ആർ മുരുഗദോസ്- വിജയ് ടീം ഒന്നിക്കുന്ന മൂന്നാമത്തെ ചിത്രം ആയിരിക്കും ഇത്. ഇതൊരു ക്ലാസ് ആൻഡ് മാസ്സ് ചിത്രം ആയിരിക്കുമെന്നും , വിജയ് എന്ന താരത്തോടൊപ്പം തന്നെ വിജയ് എന്ന നടനെയും ഉപയോഗിക്കുന്ന ചിത്രമായി മാറും ഇതെന്നാണ് അണിയറയിൽ നിന്ന് ലഭിക്കുന്ന റിപ്പോർട്ടുകൾ പറയുന്നത്. ഇതിനു മുൻപ് തുപ്പാക്കി, കത്തി എന്നീ ചിത്രങ്ങൾ ആണ് ഈ കൂട്ടുകെട്ടിൽ പുറത്തു വന്നിട്ടുള്ളതു.
നൂറു കോടി ക്ലബ്ബിൽ കയറിയ ഈ രണ്ടു ചിത്രങ്ങളും വിജയ്‍യുടെയും മുരുഗദോസിന്റെയും കരിയറിലെ പൊൻതൂവലുകൾ ആയാണ് പരിഗണിക്കപ്പെടുന്നത്. അത്രമാത്രം ജനപ്രിയത ആണ് ഈ ചിത്രങ്ങൾക്ക് ലഭിച്ചത്. ഏതായാലും ഇരുനൂറു കോടി ക്ലബ്ബിൽ കയറിയ ആറ്റ്ലീ ചിത്രം മെർസലിന് ശേഷം വിജയ് അഭിനയിക്കുന്ന ചിത്രം എന്ന നിലയിലും ഈ വരാൻ പോകുന്ന മുരുഗദോസ് ചിത്രം പ്രതീക്ഷ പകരുന്നു.
